Manava Dharmashastra 2.165.3

2.165.3

yadapi saṅkhyāyā vivakṣitatvamuktaṃ tadatyantāsambaddham | viniyogato hi saṅkhyāvivakṣā, nopapādanataḥ | sa ca viniyogaḥ svādhyāyarthamadhyayanamāha | nārthena guṇabhāvena dvitīyāntābhyāmavagataṃ prādhānyamapaiti | evaṃ hyāśrīyamāṇe grahe'pyekatvaṃ vivakṣyeta 'grahaṃ sammāṣṭīti' | pradhānabhūtasyāpi hi tasya sammārgaṃ pratyastyeva sādhanabhāvaḥ | na tvasau śabdenābhidhīyate | yathā grahairjuhotīti home'pi guṇabhāvaḥ | tasmādabhidhānaviniyogābhyāṃ prādhānyaṃ svādhyāyasya | sati ca prādhānye, na vivakṣitamekatvam | "hanta tarhi yadyekenāpi vedena gṛhītena nivarteta svādhyāyavidhyartho, vaktavyamanekavedādhyayanaprayojanam |" tṛtīye vakṣyāmaḥ | "nanu yadyavabodhaparyanto'yaṃ vidhiratadā gṛhīte'pi svarūpato vede yāvadarthāvabodho na jātastāvadantarā madhumāṃsādiyamaniyamānuṣṭhānamavyāvṛttaṃ syāt | 'tatra ko doṣaḥ' | śiṣṭasamācāravirodhaḥ | na hi śiṣṭā adhīte vede tadarthamupaśṛṇvanto'pi madhumāṃsādi varjayanti" |