Manava Dharmashastra 2.165.4

2.165.4

naiṣa doṣaḥ | asti hi smṛtyantaraṃ 'vedamadhītya snāyāt' iti | tatrādhītyeti pāṭhamātramucyate | 'snāyāditi' ca sakalasvādhyāyavidhyaṅganiyamanivṛttirlakṣyate | yathaiva madhumāṃse pratiṣiddhe evaṃ snānamapi | tatra snānamanujñāyamānaṃ sāhacaryānmadhumāṃsādīnyapi tulyaprakaraṇatvādamujānāti | strīsamprayogastu vacanāntareṇāviplutabrahmacarya iti pratiṣiddhaḥ | tadvyatikrame ca na svādhyāyavidherarthāvabodhakāle kiñcitparihīṇam | na hi tasyāmavasthāyāṃ tadaṅgaṃ, sarveṣāṃ yamaniyamānāṃ grahaṇāntatvāt | puruṣārthastvayaṃ pratiṣedhaḥ | ataeva kathañcidviplavenāvakīrṇiprāyaścittam | vratasthasya hi retaḥseko vikāraḥ, na ca vratasthaścāndrāyaṇādinā'nenopapātakaprāyaścittenādhikriyate | "kiṃ punaḥ snāyāditi lakṣaṇārthe kāraṇam ?" ucyate | na tāvadidaṃ snānamadbhiḥ śarīrakṣālanarūpamadṛṣṭārthatvaprasaṅgāt | brahmacāriniyamānāṃ cāvadhyapekṣatvādasya cāvadhisamarpakatvenāpekṣitārthavidhinopapatteḥ | "na punarevaṃ teṣāmavadhyantarāpekṣā | svādhyāyavidhyarthā hi te'tastannivṛttireva teṣāmavadhiḥ | tasya ca nivṛttirviṣayanivṛttyā | adhyayanaṃ ca tasya viṣayaḥ | tannivṛttiḥ pratyakṣaiva |" satyaṃ-yadyasya śrutaviṣayaniṣṭhataiva syāt | aśruto'pyasya viṣayaḥ phalabhūto'rthādhigamo'pi saṃskāravidhitvānyathānupapattyā viṣayatāmāpannaḥ | yataḥ śrutādhyayananiṣṭhatve vidhitvamevāsya vyāhanyeta | vidherhi svārthānuṣṭhāpakatvaṃ rūpam | svārthaśca kāryakāraṇetikartavyatātmakaḥ | tacca vidhyarthavyatirekeṇa nānyatkiñcit | na kāryaṃ karaṇaṃ viṣayaḥ, ekapadopādānāt |