Kalaviveka 77.1.34

77.1.34

na ca “ghaṭikārddha”miti vacanaṃ paratathidūṣakapañcamyāditrayavyatiriktatithiviṣayamityapi vācyam
“muhūrttenāpi saṃyuktā daśamyaikādaśī tu yā
tāmupoṣya naro mohātsukhe dharme ca mucyate ||” iti
kūrmapurāṇasya daśamyā muhūrttamātrayogenāpi apūjyatvadarśanāt
atra kasyacitsamādhānam “alpavedhenāpūjyatve dvādaśanār̤ikādivedhavacanaṃ doṣabhūyastvārtham | vyastaniṣedhe hi sati doṣalpatvamahattvābhidhānaṃ yuktam |”
sa ca prāgeva dūṣitaḥ | kintu yugmavidhiśeṣo'yamanuvādaityuktam | svalpayoglokena tithivṛddhihrāsāditirṇaya ityuktam
“ghaṭikārddhaṃ tribhāgaṃ vā” iti nindānuvādo'yam | anyathā
“nāgo dvādaśanār̤obhi”rityādyanarthaka syāt iti punaramāvāsyāprakrame darśitam
“svalpakāliko'pi vedhaḥ vedha eva | yathā “ghaṭikārddha”miti
likhitvā uktam “yattu nāgo dvādaśanār̤ībhiriti taddoṣabhūyastvakhyāpanārthaṃ sarvvatra vedhamātrasya śrutatvāditi |” tatpūrvvāparavirodhādeva heyam | kimatra dūṣaṇāntareṇa
kiñca alpavedhenāpi viddhāyā anaṅgatvāt tatrānuṣṭhānaprasattyabhāvāt niṣedhānupapattiḥ | kuto dvādaśanār̤ikādidoṣabhūyastvam | ato'saṅgatameva vacanam
abhrūkenoktaṃ “nāgo dvādaśanār̤ībhi”rityādi divyaśrāddhaviṣayam
tathāhi dharmmaḥ
“devānuddiśya yacchrāddhaṃ kriyate pitṛtṛptaye
haviṣyeṇa viśiṣṭena dvādaśyādiṣu yatnataḥ ||”
etaddivyaśrāddham
tatra
“pūrvvāhṇe daivikaṃ śrāddhamaparāhṇe tu paitṛkam
ekoddiṣṭantu madhyāhne vṛddhiśrāddhantu sāgnikam ||”
tena dvādaśanār̤īnāṃ pūrvvoktabhaṅgahetutvāt tadviṣayatvamasya†
atha durgotsavakāryyam
cāndramase'śvayuji sādhitaṃ pūrvvam