Kalaviveka 77.p1.41

77.p1.41

madhyāhnaḥ | tataḥ paraṃ tāvāneva aparāhnaḥ | sa ca vyatīpātanāmnā śrāddhakriyāyāṃ vyatīpātavat bahuphalapradāitvāt | tato'pi
parastāvāneva sāyāhnaḥ | so'pi cāparāhnāvayava evālpaphalatvena
pṛthagdarśitaḥ
ataeva chandogapariśiṣṭe kātyāyanaḥ
“piṇḍānvāhāryyakaṃ śrāddhaṃ kṣīṇe rājani śasyate
vāsarasya tṛtīyāṃśe nātisandhyāsamīpataḥ
yadā caturddaśī yāmaṃ turīyamanupūrayet
amāvāsyā kṣīyamāṇā tadaiva śrāddhamiṣyate ||”
tṛtīyāṃśo'parāhnaḥ sāyāhnassahito'nyathā aparāhne śrāddhavidhau
samīpaparyyudāso na syāt | tadā ca divasasya caturthapraharañcaturddaśī anupūrayetsamyak pūrayedityamāvāsyāparadine kṣayagāmitayā vyatīpātāparanāmāparāhlāṃśaṃ na vyāpnoti tadā parasminnahani
śrāddhamiṣyate | karttavyatayā caturthe prahare amāvāsyāprāptāvapi na
caturthayāmam anu paścāt tṛtīyaṃ yāmaṃ pūrayedyadoti yogaukīyavyākhyānamādaraṇīyam| śrutahānyaśrutakalpanāpatteḥ turīyamiti karmmatayā avagamyamānaṃ parihāya dvitīyāṃ karmmapravacanīyayogenopapadavibhaktitayā varṇayitvā karmmatayā dvitīyasyādhyāhārāt| anupūraṇañcāsamyak pūraṇaṃ lokaprasiddham
yaccoktaṃ vāyupurāṇe
“caturthe prahare prāpte yacchrāddhaṃ kurute naraḥ
āsurantadbhavecchrāddhaṃ dātā ca narakaṃ vrajet||”
yacca matsyapurāṇam
“sāyāhnastrimuhūrttaḥ syāt śrāddhaṃ tatra tu ninditam
rākṣasī nāma sā velā garhitaṃ pitṛkarmmasu||”
ayamapyetattu nindayatīti yat pūrvvamuhūrttadvayapraśaṃsārthaṃ na tu
karttavyatārtham
tathā vāyupurāṇe
“divasasyāṣṭame bhāge mandībhūte divākare
vṛthāśrāddhaṃ hi kurvvāṇo dātā ca narakaṃ vrajet||”