Abdadidhiti 4.p10

4.p10

athopāṅgalalitāvratam | tacca pūrvaviddhapañcamyāmeva kāryam | pañcamīsāmānyanirṇaye mādhavodāhṛtavacanena daive pitrye ca tadvidhānāt | yadyapi-bhuktvā jāgaraṇe nakte candrārghyavrate tathā | tārāvrateṣu sarveṣu rātriyogo viśiṣyate | iti hemādyudāhṛtavacanena jāgaraṇepetavrate'smin pūrvaviddhā niyantuṃ śakyate | tatkathāyāṃ niśi vā syādvisarjanaṃ iti jāgaraṇasya pākṣikatvapratīteḥ | tathāpi tatkathāyāmeva-vinirvartyāhnikaṃ karma śucī rāgavivarjitaḥ | catvāriṃśattathā cāṣṭau cetyādinā dantadhāvanānyuktvā maṇḍapikānirmāṇādyuktyā'parāhnasyaiva karmakālapratīteśca | pūrvaviddhāyāṃ saṃdhyāgarjite parā grāhyā | garjitaṃ saṃdhyayostyājyamiti tatraivābhidhānāt | īdṛśaviṣaye pañcamīkṣaye vā nārambhastatraivedaśābhiprāyakaniṣedhāt | vratavidhiḥ | skanda uvāca - vidhānaṃ tasya vakṣye'haṃ tacchṛṇuṣva tapodhana | śuklapakṣasya pañcamyāmiṣe māsi caredvratam | garjitaṃ saṃdhyayostyājyaṃ dinavṛddhikṣayau tathā | nirvartyāvaśyakaṃ karma śuciḥ saṅgavivarjitaḥ | tato gatvā vanaṃ vipraḥ prārthayecca vanaspatīn | āyurbalaṃ yaśo varcaḥ prajāḥ paśuvasūni ca | brahma prajñāṃ ca medhāṃ ca tvaṃ no dehi vanaspate | iti vanaspatiprārthanā | apāmārgasamudbhūtairdaintakāṣṭhaiḥ karomyaham | dantānāṃ dhāvanaṃ mātaḥ prasannā bhava sarvadā | iti dantakāṣṭhagrahaṇam | catvāriṃśattathā cāṣṭau kalpitāni vidhānataḥ | dantakāṣṭhānyupādāya taḍāgaṃ vā nadīṃ vrajet | mukhadurgandhanāśāya dantānāṃ ca viśuddhaye | ṣṭhīvanāya ca gātrāṇāṃ kurve'haṃ dantadhāvanam | iti dantadhāvanam | dantadhāvanapūrvāṇi majjanāni samācaret | tato yathāvidhi snātvā śuklavāsā gṛhaṃ vrajet | upacāraiḥ ṣoḍaśabhirebhirmantraiḥ samāhitaḥ