Jayasimhakalpadruma 10.p11

10.p11

samīpe tu dadhibhaktaghaṭaṃ nyaset | karakaḥ purataḥ sthāpyo gandho dadhisamanvitaḥ | chatraṃ ca sākṣasūtraṃ ca suyaṣṭiṃ kuṇḍikāṃ tathā | nyasettasya samīpe tu śuciḥ śuddhena cetasā | naivedyairvividhairbhakṣyaiḥ sarvatastaṃ prapūjayet | puṣpamaṇḍapikāṃ kṛtvā jāgaraṃ tatra kārayet | śaṃkhatūryaravairghoṣairbrahmaghoṣavimiśritaiḥ | evaṃ jāgaraṇaṃ kṛtvā prabhāte vimale jale | snānādikaṃ vidhāyātha homaṃ kuryāttilaiḥ saha | pūjāṃ ca pūrvavatkṛtvā vāmanasya samīpataḥ | dadyāttadvijavaryāya vāmanaṃ tilasaṃsthitam | vāmano buddhido dātā dravyastho vāmanaḥ svayam | vāmano'sya pratigrāhī tena vāmana te namaḥ | vāmanaḥ pratigṛhṇāti vāmano vai dadāti ca | vāmanastārakobhābhyāṃ tena vāmana te namaḥ | 1' iti dāna pratigrahamantrau | atra pratimāyata ityupavāsadine śravaṇadvādaśīvratāntatvena pratimāntarasthāpanaṃ, yasyāḥ pratimāyāḥ pūjanaṃ kṛtaṃ tadagre upavāsadina evodyāpanāṅgatvena pratimāntarasthāpanaṃ, yasyāḥ pratimāyāḥ pūjanaṃ kṛtaṃ tadagre upavāsadina evodyāpanāṅgatvena pratimāntarasthāpanaṃ rātrau pūjāntaraṃ vidhātumucyate | upoṣita iti cāśaktasyāpi divāhāravarjanaṃ rātripūjāṅgatvena kathyate iti draṣṭavyam | evaṃ jāgaraṇaṃ kṛtveti śloke pūrvakṛtanityasnānādibhinnaṃ vakṣyamāṇahomāṅgatvena snānavāsaḥ paridhānādi vidhīyate | udyāpanāṅgatvena jāgaraṇatulyatāṃ darśayituṃ tadanuvādaḥ | tilaiḥ saheti pāyasasyākṣatānāṃ ceti śeṣaḥ | pauruṣeṇa tu sūktena pāyasaṃ homayetsudhīḥ | paścāttilākṣatāṃścaiva pūrṇāhutyāṃ samanvitaḥ | dadyāttu dvijavaryāya vāmanaṃ vimalaṃ sthitam |' iti śāstrāntarasaṃpravādāt | atha prayogaḥ | bhādrapadaśukladvādaśyāṃ saṃgame snātvā gṛhamāgatya śravaṇadvādaśīprayuktaṃ viṣṇupūjanaṃ kṛtvāśravaṇadvādaśīvratāṅgatvenodyāpanaṃ kariṣye iti saṃkalpya tadaṅgatvena gaṇeśapūjanādyācāryavaraṇāntaṃ kuryāt | yathāvibhavaṃ tatpūjanaṃ ca | ācāryo hemavāmanapratimāyāmagnyuttāraṇaṃ kuryāt | yathāvibhavaṃ tatpūjanaṃ ca | sāyaṃ saṃdhyottarapūrvapūjitapratimāgre puṣpamaṇḍapikāyāṃ sarvatobhadrādimaṇḍalasthakalaśopari vāmanapratimāyām oṃ vāmanāyanama iti mantreṇa sahasraśīrṣetyādimantrasahitena ṣoḍaśopacāraiḥ saṃpūjayet | tatra naivedyaṃ bahuvidhaṃ pradarśayet | pūjānte devasya purataḥ dadhighaṭagandhodakapūrṇakarakaṃ chatrādi ca sādayet | tato nānāvādyaghoṣaiśca jāgaraṇaṃ kuryāt | sarvaprahareṣu nānāvidhabhakṣyairnaivedyasamarpaṇaṃ kuryāt | prātarnityasnānahomau vidhāya punaḥ snātvā dhautavāsāstilakadhāraṇaṃ kṛtvā udyāpanāṅgahomaṃ saṃkalpayet | ācāryo yadatra saṃsthitamiti sarṣapavikiraṇaprokṣaṇādideśaśuddhiṃ vidhāya homāṅgatvena sthaṇḍile'gniṃ pratiṣṭhāpyaiśānya diśe varuṇapūjanā-