Jayasimhakalpadruma 13.p11.2

13.p11.2

yavāgrayaṇaṃ ca kāryamiti smārtavṛttāvuktatvāt | sūtre vrīhiyavadevatāsaṃbaddhānāmeva mantrāṇāmāmnānācca | āhitāgnestu yavāgrayaṇasyāpyanityatvam | api vā kriyā yaveṣviti sūtrāt | yadvā vrīhyāgrayaṇena samānatantratā | śyāmākaistu prastaraṇaṃ kuryānnāgrayaṇam | yadvā tadapi samānatantramityādipariśramavatāṃ sulabhāsityalam | idaṃ cāpadi mle'pi kāryamanyathā na kāryamityādyanyatra draṣṭavyam | asyākaraṇe prāyaścittamuktaṃ kārikāyām- 'akṛtāgrayaṇo'śnīyānnavānnaṃ yadi vai naraḥ | vaiśvānarāya kartavyaścaruḥ pūrṇāhutistu vā |' iti | smṛticandrikāyām - 'nityayajñātyaye caiva vaiśvadevadvayasya ca | aniṣṭvā navayajñena navānnaprāśane tathā | bhojane patitānnasya carurvaiśvānarobhavet |' iti | ṛgvidhāne tu- 'samindrarāyāmantraṃ ca varṣevarṣejapecchatam | āgrayaṇaṃ yadā nyūnaṃ tadā saṃpūrṇameti tat |' ityuktam| etacca smārtāgrayaṇaviṣayam | asyāmeva dānaviśeṣo viṣṇudharmottare- 'āśvayujyāṃ kāṃsyapātraṃ ghṛtapūrṇaṃ dvijātaye| sasuvarṇaṃ tathā dattvā dīptaujāstviha jāyate |' iti| asyāṃgajanīrājanaṃ kāryam | taduktaṃ hemādrau ātharvaṇagopathabrāhmaṇe-athāśvayuje māsi paurṇamāsyāṃ parāhṇe hastināṃ nīrājanaṃ kuryādityādi | anyadapi kṛtyanirṇayāmṛte vīramitrodaye ca-'āśvayujyāṃ paurṇamāsyāṃ nikumbho vālukārṇavāt | āyāti senayā sārdhaṃ kṛtvā yuddhaṃ sudāruṇam | tasmāttatra narairmārgāḥ svagehasya samīpataḥ | śodhitavyāḥ prayatnena bhūṣitavyāśca maṇḍanaiḥ | puṣpārghaphaladhūpākṣasarṣapaprakaraistathā | veśmāni bhūṣitavyāni nānāraṅgairviśeṣataḥ |