Jayasimhakalpadruma 4.p68

4.p68

atha kārtikaśuklacaturthyāṃ kūrmapurāṇoktaṃ nāgavratam | madanaratne-kārtikaśuklapakṣamupakramya ‘tithau yugāhvayāyāṃ tu samupoṣya yathāvidhi | śaṃkhapālādināgānāṃ śeṣasya ca mahātmanaḥ | pūjā kāryā puṣpagandhakṣīrāpyāyanapūrvakam |' iti | yugāhvayāyāṃ caturthyām | etacca madhyāhnavyāpinyāṃ kartavyam | yathā ca skandapurāṇe-‘yugaṃ madhye dine yatra tatropoṣyā phaṇīśvarān | kṣīreṇāpyāya pañcamyāṃ kārayetprayato naraḥ | viṣāṇi tasya naśyanti na taṃ hiṃsanti pannagāḥ |' iti nāgavratam | atha mārgaśīrṣaśuklacaturthyāṃ kṛcchracaturthīvratam | skanda uvāca-‘kena bhogānavāpnoti nirvighnaṃ purasūdana | putrapautrāṃstathārogyaṃ vratenāmoti śaṃkara |' īśvara uvāca | ‘purā devāsure yuddhe asurairnirjitā raṇe | śakrādyā devatāḥ sarvāstripurāvāsibhirjitāḥ | tadā vivarṇavadanāste sarve māmupāgatāḥ | trāhi trāhi vadantaste mayāpyāśvāsitāstadā | vighnairupahatānāṃ ca samādiṣṭaṃ vrataṃ mayā | tatkṛtaṃ taistadā skanda teṣāṃ tuṣṭo gaṇādhipaḥ | gaṇeśena tu tuṣṭena vighnānāṃ saṃkṣayaḥ kṛtaḥ |' skanda uvāca-‘vidhinā kena deveśa vratametanmahāphalam | kṛtaṃ bhavati deveśa tanme brūhi vṛṣadhvaja | ' īśvara uvāca |' mārgaśīrṣe śubhe māsi sitapakṣeṣu ṣaṇmukha | caturthyāṃ niyamaṃ gṛhya vighneśaṃ pūjya yatnataḥ | puṣpairgandhaiśca naivedyairlaḍḍukaiśca susaṃskṛtaiḥ | pailaloṇḍerakaiścaiva tathā sohālakaiḥ prabhuḥ | pūjayitvā vidhānena prārthayettañca mānavaḥ | tvatprasādena deveśa vrataṃ varṣacatuṣṭayam | nirvighnena tu me yātu pramāṇaṃ mūṣakadhvaja | saṃsārārṇavadustāraṃ sarvavighnasamākulam | tasmāddīnaṃ jagannātha trāhi māṃ gaṇanāyaka | evaṃ prārthya gaṇādhyakṣaṃ bhuñjīyādvāgyatastataḥ | evaṃ krameṇa saṃpūjya ekabhaktī narottamaḥ | gaṇeśaṃ manasā dhyāyaṃstato rātrau svapedbudhaḥ | evaṃ saṃvatsaraṃ kṛtvā caturthīṃ prati ṣaṇmukha | tato mārgaśire māsi vidhānena prapūjanam | naktāśī ca bhavettadvadyāvatsaṃvatsaraṃ punaḥ | mārgaśīrṣe tu saṃprāpte tathaivāyācitī bhavet | ayācitenābdamekaṃ tato mārgaśire punaḥ | ārabhyopavasedabdamekaṃ tadvacca pūjanam | evaṃ krameṇa vidhivaccatvāryabdāni mānavaḥ | samāpya tu tato hyante vratasnāto mahāvratī | kārayeddhemaghaṭitaṃ svaśaktyākhu̍rathaṃ śubham | kārayedvarṇakaiḥ śubhrairaravindaṃ supatrakam | tasyopari ghaṭaṃ sthāpya tāmrapātreṇa saṃyutam | pūjayecchubhaśālyaistandulaireva ṣaṇmukha | tasyopari nyaseddevaṃ vāsobhirveṣṭya suvrata | pūjayetpuṣpadhūpādyairnaivedyairvividhaistathā | modakaiśca tataḥ śubhraiḥ pakvānnairghṛtapācitaiḥ | naivedyaṃ kalpayettatra gaṇeśaḥ prīyatāmiti | jāgaraṃ kārayedvidvāngītavāditraniḥsvanaiḥ | purāṇākhyānakaiścaiva tāṃ rātriṃ kṣapayedbudhaḥ | prabhāte vimale snāto homakāryāṇikārayet | tilavrīhiyavaiścaiva tathā siddhārthakaiḥ śubhaiḥ |' homaścaitairmantraiḥ kāryaḥ | oṃgaṇāya svāhā | oṃgaṇādhipataye svāhā | oṃ meghavarṇāya svāhā | oṃkūṣmāṇḍāyasvāhā | oṃtripurāntakāyasvāhā | oṃekadantāyasvāhāoṃlambodarāyasvāhā | oṃrukmadaṃṣṭrāya svāhā | oṃvighneśvarāya svāhā | oṃbrahmaṇe svāhā | oṃindrāya svāhā | oṃyamāyasvāhā | oṃvaruṇāyasvāhā | oṃsomāya svāhā | oṃsūryāya svāhā | oṃgaṇeśāya svāhā | oṃparameṣṭhine svāhā | 'aṣṭottaraśataṃ hutvā tato vyāhṛtibhirhunet | yāvacchaktyā mahābāho tato homaḥ samāpyate | tatastu arcayedvidvānācāryaṃ bhaktibhāvataḥ | vastrairābharaṇairdivyaiḥ pūjayitvā kṣamāpayet | tatpatnīṃ puruṣo bhaktyā ratnairābharaṇaiḥ śubhaiḥ | śayyāṃ dadyāttato rājansopadhānāṃ sagendukām | gāṃ savatsāṃ tato dadyātsarvālaṅkārabhūṣitām | prīyatāṃ gaṇanātho'tra iti mantramudāharet | brāhmaṇāmbhojayedbhaktyā caturviṃśatisaṃkhyayā