Jayasimhakalpadruma 4.p73.2

4.p73.2

saptakalpasahasrāṇi iha loke mahīyate |' iti matsyapurāṇoktamaṅgārakacaturthīvratam | atha bhaviṣyatpurāṇoktaṃ gaṇeśavratam | brahmovāca | ' gaṇeśaḥ pūjitaḥ kuryāccaturthyāṃ sarvakarmasu | avighnaṃ suraloke ca gatimiṣṭāṃ prayacchati | karmasvaviduṣāṃ vighnaṃ kuryāccaiva na saṃśayaḥ |' aviduṣāṃ smaraṇamakurvatāṃ tena karmakāle'vaśyaṃ kartavyaḥ pūjyaśca | ' mūlamantrāḥ svasaṃjñābhiraṅgamantrāśca kīrtitāḥ | pūrvavatpadmamadhyasthaḥ kartavyaśca tithīśvaraḥ |' atra tithīśvaro gaṇeśaḥ ' gandhapuṣpopahāraiśca yathāśaktyā vidhīyate | pūjāśāṭhyena śāṭhyena kṛtāpi tu phalapradā | ājyadhārāsamidbhiśca dadhikṣīrānnamākṣikaiḥ | pūrvoktaphalado homaḥ kṛtaḥ śāntena cetasā |' iti bhaviṣyatpurāṇoktaṃ gaṇeśavratam | sūta uvāca | ' caturthyāṃ na tu bhuñjīta snātvā nadyāṃ nṛpottama | raktāmbaradharo bhūtvā raktagandhānulepanaiḥ | raktavīto gaṇādhīśaṃ vināyakamathārcayet | raktacandanatoyena snānapūrva vidānataḥ | vilipya raktagandhena raktapuṣpairapūjayat | tato'sau dattavāndhūpamājyayuktaṃ sacandanam | naivedyaṃ caiva hāridraṃ guḍakhaṇḍaghṛtaplutam | evaṃ saṃvatsaraṃ pūjya vināyakamathāstuvat |' ikṣvākuruvāca | ' namaskṛtvā mahādevaṃ stoṣye'haṃ taṃ vināyakam | mahāgaṇāpatiṃ śūramūrjitaṃ jayavardhanam | ekadantaṃ dvidantaṃ ca caturdantaṃ caturbhujam| tryakṣaṃ triśūlahastaṃ ca raktanetraṃ varapradam | āmbikeyaṃ śaṅkakarṇaṃ pracaṇḍaṃ daṇḍanāyakam | āraktaṃ daṇḍinaṃ caiva vahnivaktraṃ hutapriyam | anārcato vighnakaraḥ sarvakāryeṣu yo nṛṇām | taṃ namāmi gaṇādhyakṣaṃ bhīmamugramumāsutam |