Jayasimhakalpadruma 4.p73.3

4.p73.3

madamattaṃ virūpākṣaṃ bhavacakrasamudbhavam | sūryakoṭipratīkāśaṃ bhinnāñjanasamaprabham | budhaṃ suniścitaṃ śāntaṃ namasyāmi vināyakam| namo'stu brahmarūpāya viṣṇurūpāya te namaḥ | namo'stu gajarūpāya gajānāṃ pataye namaḥ | merumandararūpāya namaḥ kailāsavāsine | namo vighnavināśāya namaste brahmacāriṇe | bhaktastutāya devāya namastubhyaṃ vināyaka | tvayā purāṇe pūrveṣāṃ devānāṃ kāryasiddhaye | gajarūpaṃ samāsthāya trāsitāḥ sarvadānavāḥ | ṛṣīṇāṃ devatānāṃ ca kṛtāḥ sarve manorathāḥ | yatastataḥ surairugraiḥ pūjyase tvaṃ bhavātmaja | tvāmārādhya gaṇādhyakṣaṃ sarvajñaṃ kāmarūpiṇam | kāmārthaṃ raktakusumai raktacandanavāribhiḥ | raktāmbaradharo bhūtvā caturthyāmarcayejjapet | trikālamekakālaṃ vā niyato niyatāśanaḥ | rājānaṃ rājaputraṃ vā rājamantriṇameva ca | rājyaṃ vā sarvavighneśa vaśīkuryātsarāṣṭrakam | avighnaṃ tapasāmadya kuru vighnavināyaka | mayā tvaṃ saṃstuto bhaktyā pūjitaśca viśeṣataḥ | yatphalaṃ sarvatīrtheṣu sarvayajñeṣu yatphalam | tatphalaṃ sarvamāpnoti stutvā devaṃ vināyakam | viṣamaṃ na bhavettasya na sa gacchetparābhavam | na ca vighno bhavettasya jāto jātismaro bhavet | ya idaṃ paṭhati stotraṃ ṣaḍbhirmāsairvaraṃ labhet | saṃvatsareṇa siddhiṃ ca labhate nātra saṃśayaḥ|' iti nṛsiṃhapurāṇoktaṃ gaṇeśacaturthīvrataṃ gaṇeśastotraṃ ca samāptam | athāṅgārakaśuklacaturthyāṃ bhaviṣyapurāṇoktaṃ sukhacaturthīvratam | sumanturuvāca | ' sukhāvahāṃ śṛṇu sukhāṃ saubhāgyakaraṇīṃ parām | caturthī kuruśārdūla rūpasaubhāgyadāṃ śubhām | sukhavrataṃ mahāpuṇyaṃ rūpārogyapradāyakam |