Madanaparijata 10.p1.24

10.p1.24

mātāmahānāmapyevaṃ tantraṃ vā vaiśvadaivikam
vaśiṣṭhaḥ
api vā bhojayedekaṃ brāhmaṇaṃ vedapāragam
yadyekaṃ bhojayecchrāddhe daivaṃ tatra kathaṃ bhavet
annaṃ pātre samuddhṛtya sarvvasya prakṛtasya tu
devatāyatane kṛtvā yathāvidhi samācaret
prāśyedannaṃ tadagnau tu dadyādbrahmacāriṇe
devalaḥ
śvaḥ karttāsmīti niścitya dātā viprānnimantrayet
nirāmiṣaṃ sakṛdduktvā sarvvabhuktajane gṛhe
yamaḥ
jātikriyāvabodhādyairguṇairyuktānalolupān
prārthayīta pradoṣānte bhuktānaśayitāndvijān
prārthanaprakāramāha pracetāḥ
kṛtāpasavyaḥ pūrvedyuḥ pitṝn pūrvvaṃ nimantrayet
bhavadbhiḥ pitṛkāryyaṃ naḥ saṃpādyañca prasīdata
savyena vaiśvadevārthaṃ praṇipatya nimantrayet
nimantraṇaṃ śiṣyādibhirapi kāryyam
svayaṃ śiṣyo'thavā sutaḥ
savarṇaṃ prerayeddāsaṃ dvijānāmupamantraṇe
abhojyaṃ brāhmaṇasyānnaṃ vṛṣalena nimantritam
tathaiva vṛṣalasyānnaṃ brāhmaṇena nimantritam
te taṃ tathetyavighnena gateyaṃ rajanī yadi
yathākramaṃ† pratīkṣeran śrāddhakālamatandritāḥ
anindyenāmantrito nāpakrāmedvidhivatketanaṃ pratigṛhya
śaktaḥ sannāpakrāmet
manuyamau
ketanantu yathānyāya brāhmaṇo havyakavyayoḥ
kathañcidyadyatikrāmetpāpaḥ śūkaratāṃ vrajet
nimantritabrāhmaṇaparityāge yamanārāyaṇau
ketanaṃ kārayitvā tu yo'tipātayate dvijaḥ
nivārayati durmatiriti nārāyaṇapāṭhaḥ
brahmahatyāmavāpnoti śūdrayonau ca jāyate
nārāyaṇaḥ
āmantritastu yaḥ śrāddhe kuryyādanyasya bhojanam
saṃvatsarakṛtaṃ puṇyaṃ tasya naśyati durmateḥ
anyatra nimantritaḥ sannanyatra yaḥ pratigṛhṇāti taṃ prati devalaḥ
pūrvaṃ nimantrito'nyena kuryyādanyapratigraham