Nrisimhaprasada p160.3

p160.3

tathā ca śaunakaḥ— "hemantaśiśirayoścaturṇāmaparapakṣāṇāmaṣṭamīṣvaṣṭakā" iti | atrāpi śrāddhamāvaśyakam | tathā ca smṛtiḥ— “amāvāsyāvyatīpātapaurṇamāsyaṣṭakāsu ca | vṛddhau śrāddhamakurvāṇo narakaṃ pratipadyate” iti vṛddhiḥ putrajanmādi | “vṛddhau na tarpitā yena devatā gṛhamedhibhiḥ | taddīnamaphalaṃ jñeyamāsuro vidhiraiva sa” iti śātātapasmaraṇāt | kṛṣṇapakṣo'parapakṣaḥ | tatraikatithipakṣe'pi amāyāṃ pṛthageveti | idamapi nityam | “śākenāpi nāparapakṣamati krāmedi”ti śruteḥ | ayanadvayaṃ dakṣiṇāyanamuttarāyaṇaṃ ca | atrāpi śrāddhaṃ nityam | taduktaṃ viṣṇupurāṇe parāśareṇa— “upaplave candramaso raveśca triṣvaṣṭakāsvapyayanadvaye ca | pānīyamapyatra tilairvimiśraṃ dadyātpitṛbhyaḥ prayato manuṣyaḥ | śrāddhaṃ kṛtaṃ tena samāḥ sahasraṃ rahastadetanmunayo vadanti” || atra pānīyamapyatreti vacanaikadeśādayanaśrāddhasya nityatā'vasitā | “grahoparāge ca sute ca jāte pitrye'pyamāyāmayanadvaye ca | nityaṃ ca śaṅkhe ca tathaiva padme dattaṃ bhavenniṣkasahasratulyam” iti jātūkarṇyasmaraṇāt | tasmādayanadvaye śrāddhaṃ nityam | dravyaṃ kṛsaramāṣādi | brāhmaṇaḥ śrutādhyayanasampannaḥ sa ca vakṣyamāṇalakṣaṇaḥ tayoḥ sampattilābho yasmin kāle sa tathoktaḥ | viṣuvat meṣatulāsaṅkrāntī, sūryasaṅkramaḥ sūryasya rāśeḥ rāśyantaraprāptiḥ | sūryasaṅkramaśabdena ayanaviṣuvatogrrahaṇe siddhe'pi