Nrisimhaprasada p192.4

p192.4

pūrvavatpṛthagekaikamekaikaṃ cārcayet kramādi”ti smaraṇāt | pādataḥ paṭhitasyāpi pūṣānumantraṇavadutkarṣaḥ | tasya daivikatvāt | tato— “gotrasambandhanāmāni pitṝṇāmanukīrtayet | ekaikasya tu viprasya arghyaṃ pātre viniikṣipet” ityukteḥ sapavitrahaste yā divyā iti mantramuccārya mantrānte amukaśarmanneṣa te'rgha iti vadet | strīviṣaye gotre devi amukaśarman iti viśeṣaḥ | chandogāścedevaṃ vadeyuḥ-imamme iti mantraṃ paṭhitvā amukasagotra śarman eṣa te arghaḥ ye ca tvāmanu tasmai te svadhetyapa upaspṛśet’ sarvatraivam | naikoddiṣṭe, tatra eṣa te'rghaḥ svadhetyetadeva vadet | strīviṣaye ūhaḥ, eṣa te'rghaḥ yāśca tvāmanu iti | gotraśabdaḥ sakāreṇaiva vaktavyaḥ | amukasagotreti | yato hi sakāraḥ pāpaṃ vihanti | “sakāreṇa hi kartavyaṃ gotraṃ sarvatra dhīmatā | sakāraḥ kutapo jñeyastasmādyatnena taṃ vadet” || kutsitaṃ pāpaṃ tāpayatīti kutapaḥ iti vyutpattiḥ “pāpaṃ kutsitamityāhustasya santāpako hyasau | prayuktastu bhavedyasmāt kutapastu tataḥ smṛtaḥ” iti smaraṇaṃ ca| tata amukasagotra iti sarvatra kartavyaṃ, strīviṣaye amukasagotreti | atrāyamanuṣṭhānakramaḥ | tilān apahatā asurā rakṣāṃsītyādinā mantreṇa brāhmaṇānparito'pradakṣiṇāmavakīrya rājatādipātreṣu triṣu yugmakuśanirmitakūrcāntarhiteṣu śanno devīriti mantreṇāpaḥ kṣiptvā tilo'sīti pūrvābhihitamantreṇa tilān gandhapuṣpāṇi nikṣipya svadhā'rghyā iti brāhmaṇānāṃ purataḥ pātrāṇi sthāpayitvā yā divyā iti mantreṇa pitaridaṃ te'rghyamiti dadyāt |