Nrisimhaprasada p211.4

p211.4

evaṃ piṇḍān nirvartya svacitamastviti yajñopavītī bhūtvā vidhiṃ sampādya suprokṣitamastviti śrāddhadeśaṃ samprokṣya pradakṣiṇayena brāhmaṇahaste vāri puṣpānnatāṃśca datvā sakuśalān yavāṃśca punarudakādi datvā aghorāḥ pitaraḥ santvityukte dvijaiste gotraṃ vardhatāmiti na stathetyukte taiśca punaḥ dātāro no'bhivardhantāṃ vedāḥ santatireva ca | śraddhā ca no mā vyagamad bahu deyaṃ ca no'stviti satyā etā āśiṣaḥ santu santu ityuktastaiḥ punariti | etadanantaraṃ pātracālanaṃ kṛtvā svastivācanaṃ kuryāt | “acālayitvā tatpātraṃ svasti kurvanti ye dvijāḥ | nirāśāḥ pitaro yānti yathā''yāntitathā gatāḥ” iti nārāyaṇavacanāt | pātracālane viśeṣaḥ | “pātrāṇi cālayecchrāddhe svayaṃ śiṣyo'thavā sutaḥ | na strībhirna ca bālena nāsajātyā kathañcana” iti | tato'kṣayyamastviti brāhmaṇahaste jalaṃ dadyāt | tato yathāśakti dakṣiṇāṃ datvā svadhāṃ vācayiṣye ityuktvā tairbrāhmaṇairvācyatāmityukte 'nujñātaḥ prakṛtapitrādibhyo mātāmahādibhyaśca svadhocyatāmityudāhṛtya tairastu svadhetyukte bhūmau jalamāsicya viśvedevā ityukte dātāro no'bhivardhantāmityādi mantraṃ vācayitvā priyavācā praṇāmaṃ vidhāya vāje vāje iti japitvā dhanyā vayaṃ bhavaccaraṇakamalayugala pavitrīkṛtamasmadgṛhamiha dinamiti | ato bhavadbhiranugṛhītā vayamiti praṇipātapradakṣiṇāpūrvaṃ namaskṛtya visarjayet | atra viśeṣaḥ | “patlyai prajārthaṃ dadyāttu madhyamaṃ mantrapūrvakam” iti | madhyamaṃ madhyamapiṇḍam | atra mantraḥ- “ādhatta pitaro garbhaṃ mantraḥ santatidāyakaḥ” | tathā ca manuḥ— “pativratā dharmapatnī pitṛpūjanatatparā |