Nirnayasindhu 24.3

24.3

tatra pṛthvīcaṃdrodaye viṣṇusmṛtipādmayoḥ- "tulāmakarameṣeṣu prātaḥsnānaṃ vidhīyate | haviṣyaṃ
brahmacaryaṃ ca mahāpāta kanāśanam " iti sauramāsa uktaḥ | prācyāścaitadevādriyante | dākṣiṃṇātyāstu--"āśvinasya tu māsasya yā śuklaikādaśī bhavet | kārttikasya vratānīha
tasyāṃ vai prārabhetsudhīḥ" iti pādmokteḥ || bhārgavārcane ca- "prārabhyaikādaśīṃ śuklāmāśvinasya tu mānavaḥ | prātaḥ snānaṃ prakurvīta yāvatkārttikabhāskaraḥ" iti viṣṇurahasyokteḥ || hemādrāvādityapurāṇe--'pūrṇa āśvayuje māsi paurṇamāsyāṃ samāhitaḥ' ityuktvā
'māsaṃ samagraṃ parayā ca bhaktyā samāpyate kārttikapaurṇamāsyām ' ityante'bhidhānāccāśvinaśuklaikādaśyāṃ paurṇamāsyāṃ vārabhya kārttikaśukladvādaśyāṃ paurṇamāsyāṃ vā samāpayedityāhuḥ | madanapārijāte viṣṇuḥ--“kārttikaṃ sakalaṃ māsaṃ nityasnāyī jiteṃdriyaḥ | japanhaviṣyabhukchāntaḥ sarvapāpaiḥ pramucyate
tatra deśaviśeṣaḥ
atra deśaviśeṣaḥ pādme kārttikaṃ prakramya-“kurukṣetre koṭiguṇo gaṃgāyāmapi tatsamaḥ
tatodhikaḥ puṣkare syāddvāravatyāṃ ca bhārgava || puṇyāḥ puryaśca saptaivaṃ munayo mathurādhikāṃ
durlabhaḥ kārttiko viprā mathurāyāṃ nṛṇāmiha || yatrārcitaḥ svakaṃ rūpaṃ bhaktebhyaḥ saṃprayacchati ”