Shraddhacandrika (Divakarabhatta) 2.p63.3

2.p63.3

vāsoyugaṃ pradātavyaṃ pitṛkṛtye vipaścitā || niṣkrayo vā yathāśakti vastrālābhe pradīyate | brahmavaivartte-yajñopavītaṃ dātavyaṃ vastrābhāve vijānatā | pitṝṇāṃ vastradānasya phalaṃ tenāpnute'khilam || samarthasya niṣkrayo'samarthasya yajñopavītamiti vyavasthitavikalpaḥ | viṣṇudharmottare-strīṇāṃ śrāddhe tu sindūraṃ dattuścaṇḍāttakāni ca | nimantritābhyaḥ strībhyo ye te syuḥ saubhāgyasaṃyutāḥ || caṇḍātakāni strīparidhānocitānyaṃśukānīti hemādriḥ |(1) brahmāṇḍe -nāmāpi na grahītavyaṃ nīlīraktasya vāsasaḥ | darśanātkīrttanānnīlyā nirāśāḥ pitaro gatāḥ || ityācchādananirūpaṇam | pūrvaṃ vastrapratinidhitvenopavītadānamuktamadhunā satyapi vastre gandhapuṣpādivanmukhyatayaiva yajñopavītaṃ dātavyamityucyate | hemādrāvādityapurāṇe -pitṛnsatkṛtya vāsobhirdadyādyajñopavītakam | yajñopavītadānena vinā śrāddhaṃ tu niṣphalam || tasmādyajñopavītasya dānamāvaśyakaṃ smṛtam | iti |(2) kālikāpurāṇe -nirvartya brāhmaṇādeśātkriyāmevaṃ yathāvidhi | punarbhūmiṃ ca saṃśodhya paṅkterantaramācaret || bhājanāni tato dadyāddhastaśaucaṃ punaḥ kramāt | bhūśodhanamarcanaprasaṅgātpatitagandhapuṣpadarbhāpanayanam | antaraṃ= vicchittiḥ | bhojanapātrādhobhūmau maṇḍalamāha -