Shraddhamanjari (Bapubhatta Kelakara) 6.1.20

6.1.20

akaraṇe sāṃkalpikaprayogaḥ | iti hiraṇyaśrāddham | atha sāṃkalpikaśrāddham | taccāśaktena kartavyam | taduktaṃ nirṇayasindhausamagraṃ yastu śaknoti kartuṃ naiveha pārvaṇam
api saṃkalpavidhinā kāle tasya vidhīyate
saṃkrāntau grahaṇe pāte yugamanvantarādiṣu
bharaṇyāṃ cāpi kurvīta śrāddhaṃ piṇḍaṃ vinaiva tu
yugādiṣu maghāyāṃ ca viṣuvatyayane tathā
bharaṇīṣu ca kurvīta piṇḍanirvapaṇaṃ na hi
paurṇamāsīṣu sarvāsu niṣiddhaṃ piṇḍapātanam
varjayitvā proṣṭhapadīṃ yathā darśastathaiva sā || iti
putre jāte vyatīpāte grahaṇe candrasūryayoḥ
śrāddhaṃ kuryātprayatnena piṇḍanirvapaṇādṛte
vivāhe vihitānmāsāṃstyajeyurdvādaśaiva hi
sapiṇḍāḥ piṇḍanirvāpaṃ mauñjībandhe ṣaḍeva hi
vivāhavratacūḍāsu varṣamardhaṃ tadardhakam
piṇḍadānaṃ mṛdā snānaṃ na kuryāttilatarpaṇam
tadvidhimāha pṛthvīcandrodaye vasiṣṭhaḥāvāhanaṃ svadhāśabdaṃ piṇḍāgnaukaraṇaṃ tathā
vikiraṃ cārthyadānaṃ ca sāṃkalpe paṅgavivarjayet
samantrakasyā''vāhanasya niṣedhaḥ | tūṣṇīṃ bhavatyeveti hemādyādayaḥ
nākṣayyavācanamiti sindhau | candrikāyāṃ vṛddhaśātātapaḥpiṇḍanirvvāparahitaṃ yattu śrāddhaṃ vidhīyate
svadhāvācanalopo'tra vikirastu na lupyate
akṣayyadakṣiṇāsvastisaumanasyaṃ yathāsthitam | iti
ato vikirākṣayyayorvikalpaḥ | sindhau smṛtyantaramaṅgāni pitṛyajñasya yadā kartuṃ na śaknuyāt
sa tadā vācayedviprānsaṃkalpātsiddhirastviti