Shraddhamanjari (Bapubhatta Kelakara) 6.1.38

6.1.38

dākṣiṇātyāstvevamevā''caranti | asminpakṣe paurṇamāsyāṃ mṛtasya
sakṛnmahālayaśrāddhaṃ tvamāvāsyāyāṃ kāryam | kecidbhādrapadapaurṇamāsyāṃ
kāryamiti vadanti tanna yuktisaham | paurṇamāsyāḥ kṛṣṇapakṣīyatvāsaṃbhavāt | ṣoḍaśamahālayaśrāddhapakṣe paurṇamāsīmārabhyāmāvāsyāparyantaṃ ṣoḍaśadinasaṃpādanaṃ hemādriṇā pākṣikamuktaṃ tadapi granthakārairanaṅgīkṛtam
ataḥ śuklapañcamyāṃ mṛtasya yathā bhādrapadakṛṣṇapañcamyāṃ kurvanti tathedamapi
śuklapañcadaśyāṃ mṛtasya kṛṣṇapañcadaśyāmeva sakṛnmahālayaśrāddhaṃ yuktamiti
yadā vighnavaśena pakṣamadhye sakṛnmahālayaśrāddhaṃ na jātaṃ cattadā''śvinaśuklapañcamīparyantaṃ kartavyamiti kaustubhe | āśvinaśuklapañcamīmārabhyā''śvinakṛṣṇapañcamīparyantaṃ pūrvoktapratipadādiniṣiddharahite kasmiṃściddine kāryamiti kamalākaraḥ | tatrāpyasaṃbhava āśvinakṛṣṇāmāyā kāryam | tatrāpyasaṃbhave vṛścikasaṃkramaṇapraveśaparyantamapi kāryam | etacca piturmaraṇe prathamābde kṛtākṛtamiti sindhau | keciddākṣiṇātyā bhādrapadakṛṣṇapratipadi
anucchiṣṭasaṃjñakaṃ kurvanti | paṭhanti caprathamābde prauṣṭhapadyāṃ pituḥ śrāddhaṃ kṛtākṛtam
anucchiṣṭaṃ tu nandāyāṃ prauṣṭhapadyāṃ tu kārayet || iti
tadetanmahāgranthānupalambhāccintyam | atra viśve devā dhūrilocanasaṃjñakāḥ | api kanyāgate sūrye kāmye ca dhūrilocanāviti smaraṇāt
atra kanyāgata ityupalakṣaṇam | tenāgate'vyaparapakṣaśrāddhe dhūrilocanāveva
kecitpurūravārdravā eveti vadanti | apare tu mahālayaśrāddhasya nityatve
purūravārdravau | kāmyatve dhūrilocanāvityāhuḥ