Tirthacintamani 4.p149

4.p149

anekaśatasāhasrairvimānaiḥ samalaṅkṛtam | siddha-vidyādharairyakṣairbhūṣitaṃ daityadānavaiḥ || aśītikalpakālantu tatra bhuktvā sukhaṃ naraḥ | tadante yāti golokaṃ sarvvabhogasamanvitam || surasiddhāpsarobhiśca śobhitaṃ sumanoharam | tatra saptatikalpāṃstu bhuktvā bhogamanuttamam || durlabhaṃ triṣu lokeṣu svasthacitto jitendriyaḥ | tasmādāgacchate lokaṃ prājāpatyamanuttamam || gandharvvāpsarasaiḥ siddhairmunividyādharairvṛtaḥ | ṣaṣṭikalpaṃ sukhaṃ tatra bhuktvā nānāvidhaṃ mudā || tadante śakrabhavanaṃ nānāvyarthasamanvitam | gandharvvaiḥ kinnaraiḥ siddhaiḥ sura-vidyādharoragaiḥ || guhyakā'psarasaiḥ sādhyairvṛtañcānyairdivaukasaiḥ | āgatya tatra pañcāśatkalpān bhuktvā sukhaṃ naraḥ || suralokaṃ tato gatvā vimānaiḥ samalaṅkṛtaḥ | durlabhaṃ pāvanaṃ dhīmān devaiḥ sarvvaiḥ samanvitaḥ || tadante yogināṃ lokaṃ gatvā mokṣapradaṃ śivam | tatra catvāriṃśatkalpaṃ bhuktvā bhogān sudurlabhān || gacchati tu tato lokaṃ nakṣatrākhyaṃ sudurlabham | tato bhogān varān bhuṅkte triṃśatkalpān yathepsitān | tasmādāgacchate lokaṃ śaśāṅkasya dvijottamāḥ | yatrā'sau tiṣṭhate somaḥ sarvvairdevairalaṅkṛtaḥ || tatra viṃśatikalpantu bhuṅkte bhogaṃ sudurlabham | ādityasya tato lokamāyāti surapūjitam || nānāścaryyamayaṃ puṇyaṃ gandharvvāpsaraḥsevitam | tatra bhuktvā śubhān bhogān daśakalpān dvijottamāḥ || tasmādāyāti bhuvanaṃ gandharvvāṇāṃ sudurlabham | tatra bhogān samastāṃśca kalpamekaṃ yathāsukham || bhuktvā cā''yāti medinyāṃ rājā bhavati dhārmmikaḥ | cakravarttī mahāvīryyo guṇaiḥ sarvvairalaṅkṛtaḥ || kṛtvā rājyaṃ svadharmeṇa yajñairiṣṭvā sudakṣiṇaiḥ | tadante yogināṃ lokaṃ gatvā mokṣapradaṃ śivam || tatra bhuktvā parān bhogān yāvadāhūtasaṃplavam | tasmādāgacchate cā'tra jāyate yogināṃ kule || pravare vaiṣṇave viprā durlabhe sādhusammate | caturvedī vipravaro yajñairiṣṭvā'sadakṣiṇaiḥ || vaiṣṇavaṃ yogamāsthāya tato mokṣamavāpnuyāt