Tirthacintamani 4.p33

4.p33

rājovāca— prīto'si yadi me nātha vṛṇomi varamuttamam | devāsurāḥ sagandharvvā yacca rakṣo-mahoragāḥ1 || siddhavidyādharāḥ sādhyāḥ kinnarā guhyakāstathā | ṛṣayo ye mahābhāgā nānāśāstraviśāradāḥ || parivrāḍ-yogayuktāśca vedatattvārthacintakāḥ | mokṣamārgavido ye'nye dhyāyanti paramaṃ padam || nirguṇaṃ nirmalaṃ śāntaṃ yaṃ paśyanti manīṣiṇaḥ | tatpadaṃ gantumicchāmi tvatprasādāt sudurlabham || bhagavānuvāca— sarvvaṃ2 bhavatu bhadraṃ te yatheṣṭaṃ sarvvamāpnuhi | bhaviṣyati yathākāmaṃ matprasādānna saṃśayaḥ || daśa varṣasahasrāṇi tathā nava śatāni ca | avicchinnaṃ mahārājyaṃ kuru tvaṃ nṛpasattama || prapatsyasi3 paraṃ divyaṃ durlabhaṃ yat surāsuraiḥ | pūrṇaṃ manorathaṃ śāntaṃ śuddhamavyaktamavyayam || parātparataraṃ sūkṣmaṃ nirlepaṃ niścalaṃ dhruvam | cintāśokavinirmuktaṃ kriyākāraṇavarjjitam || tadahaṃ darśayiṣyāmi jñeyākhyaṃ paramaṃ padam