Tirthacintamani 4.p58

4.p58

yastvimāṃ pratimāṃ gacchenmādhavākhyāṃ śaśiprabhām | śaṅkha-gokṣīrasaṅkāśāśeṣāmaghavināśinīm || tāṃ praṇamya sakṛdbhaktyā puṇḍarīkanibhekṣaṇām | vihāya sarvvalokān vai mama loke mahīyate || manvantarāṇi tatraiva devakanyābhirāvṛtaḥ | gīyamānaśca madhuraṃ siddhagandharvvasevitaḥ || bhunakti vipulān bhogān yatheṣṭaṃ māmakaiḥ saha | cyutastasmādihāgatya manuṣyo brāhmaṇo bhavet || vedavedāṅgavit śrīmān bhogavān cirajīvitaḥ | gajāśvarathaśālāḍhyo dhanadhānyāhṛtaḥ śuciḥ | rūpavān 'bahubhāgyaśca putrapautrasamanvitaḥ || puruṣottamaṃ punaḥ prāpya vaṭamūle'tha sāgare || tyaktā dehaṃ hariṃ smṛtvā tataḥ śāntaṃ padaṃ vrajet | śvetamādhavamālokya samīpe matsyamādhavam || ekārṇave jale pūrvvaṃ rohitaṃ rūpamāsthitam | vedānāṃ haraṇārthāya rasātalatale sthitam || cintayitvā śvetamatsyaṃ kasmin sthāne vyavasthitam | ādyāvataraṇaṃ rūpaṃ mādhavaṃ 'matsyarūpiṇam || praṇamya prayato bhūtvā sarvvān duḥkhān vimuñcati | prayāti paramaṃ sthānaṃ yatra devo hariḥ svayam