Tirthaprakasha 3.p4

3.p4

idaṃ ca muṇḍanaṃ tādṛśe tīrapradeśe sthitvā kāryyaṃ yathā vāyununnāḥ keśādyāḥ svayameva tīrthe patanti | yāvanti nakhalomāni vāyunā preritāni vai | patanti jāhnavītoye narāṇāṃ puṇyakarmaṇām || iti vacanāt | keśānāṃ yāvatī saṅkhyā chinnānāṃ jāhnavījale | tāvadvarṣasahasrāṇi svargaloke mahīyate || iti vacanācceti | na tu svayaṃ prakṣepyāḥ “keśanakhalomāni apsu na kṣipet” iti gadyaśaṅkhavacanāt | tīrthavapanādau viśeṣa uktaḥ-aparārke, udaṅmukhaḥ prāṅmukho vā vapanaṃ kārayetsudhīḥ | keśaśmaśrulomanakhānyaduksaṃsthāni vāpayet || dakṣiṇaṃ karṇamārabhya dharmārthaṃ pāpasañcaye | śikhādyaṃ navasaṃskāre śikhādyantaṃ śiro vapet || dharmārthaṃ tīrthādivapane dakṣiṇakarṇamārabhyodaksaṃsthaṃ vapet | pāpasañcayanimittake prāyaścittāvau śikhāmagre tato'dhastāt sarvaṃ vapet nātrodaksaṃsthatā | navasaṃskāre cūḍākaraṇe dakṣiṇakarṇācchikhāntaṃ śikhāmārabhya vāmakarṇāntaṃ vapedityarthaḥ | atha tīrthasnānam | kaurmye, pṛthivyāṃ sarvatīrtheṣu snātvā puṇyeṣu ca dvijāḥ | mucyate pātakaiḥ sarvaiḥ samastairapi pūruṣaḥ || bhārate, nāvrato nākṛtātmā ca nāśucirna ca taskaraḥ | snāti tīrtheṣu kauravya na ca vakramatirnaraḥ || snānaṃ tu viparītanadīpravāhādau na karttavyaṃ śiṣṭācārāt | paṭhanti ca-