Tirthaprakasha 4.p116

4.p116

anyakṣetrakṛtaṃ pāpaṃ puṇyakṣetre vinaśyati | puṇyakṣetrakṛtaṃ pāpaṃ gaṅgātīre praṇaśyati || gaṅgātīre kṛtaṃ pāpaṃ vārāṇasyāṃ praṇaśyati | vārāṇasyāṃ kṛtaṃ pāpamantargehe vinaśyati || antargehe kṛtaṃ pāpaṃ vajralepo bhaviṣyati | vajralepacchidaṃ hyetat pañcakrośapradakṣiṇam || tasmātsarvaprayatnena kuryāt kṣetrapradakṣiṇam | ityāhuḥ | kalpatarau tu, māghamāsamathopoṣyū tato vārāṇasīṃ gataḥ | daśāśvamedhe gaṅgāyāṃ tīrthe suragṛhādiṣu || sarvapāpaharāhyeṣu sampūjya pitṛdevatāḥ | pradakṣiṇīkṛtya purīṃ pūjyāvimuktakeśavau || lolaṃ divākaraṃ dṛṣṭvā tato madhuvanaṃ yayau | ityetāvadevābhihitam | prāyaścittāntaramuktambrahmavaivartte, mahādeva uvāca | śṛṇu devi rahasyaṃ me dharmaḥ sūkṣmo' bhavetsadā | sūkṣmo'tīndriyaḥ | na jānanti sthūladhiyo viṣayāsaktamānasāḥ || svalpadravyeṇa ca mahān mahatā'pyaṇumātrakaḥ | deśaṃ kālaṃ tathā pātraṃ vittaṃ śraddhādikaṃ mahat || karoti suvicāryyāśu yena kāśī prasīdati | deśādikaṃ vicāryya yaṃ dharmaṃ karoti sa mahānbhavatītyarthaḥ| mama kṣetre tu dhaninaḥ pāpiṣṭhāḥ śuddhikāṅkṣiṇaḥ || śivālayaḥ prakarttavyo mahāpātakanāśanaḥ | mahāpuṇyapradaścaiva mahāsukhakaraśca ha || yatra tiṣṭhati nirvighnaṃ śivaliṅgaṃ varānane ! | tatra devālayaḥ kāryaḥ pūjā bhavati yatra ca || śivaliṅgasthāpakānāṃ śivaprāsādakāriṇām | yānti nāśaṃ vinā kleśaiḥ pātakāni mahāntyapi || śivaliṅgapratiṣṭhāṃ yaḥ kuryāt pāpaśatānvitaḥ | pātakāni vinaśyanti tasya mokṣo'pyadūrataḥ || bhaviṣye, mṛdvārviṣṭakaśailaiśca yaḥ kuryāttu śivālayam | dvisaptakulasaṃyuktaḥ śivaloke mahīyate || tathā, mṛnmayāt koṭiguṇitaṃ phalaṃ syāddārubhiḥ kṛtam | pādme, tadbhaṅktvā'nyattu yaḥ kuryāt sa gacchennarakaṃ mahat | prāyaścittāntaramapyuktambrahmavaivartte, mahādeva uvāca | śṛṇu devi ! rahasyaṃ me kṛpaṇeṣu na tadvadet | aśraddhādūṣitamatau pāpabhīrau na nāstike || śraddhālave vadānyāya vā''pannatrāya sādhave | brūyādrahasyaṃ paramaṃ yathā dharmaḥ prasiddhyati || vārāṇasyāṃ gṛhaṃ kṛtvā brāhmaṇāya prayacchati | śuddhāya vedaviduṣe śivaviṣṇupriyāya ca || nirantaraṃ dharmakathāyajñadānapriyāya ca | vivekine mahāvidyāyuktāya priyavādine || dātavyameva sugṛhaṃ kārayitvā viśeṣataḥ | kāśyāṃ kṛtānāṃ pāpānāṃ kāyavāṅmanasā khalu || nāśaḥ paro'yaṃ sandiṣṭaḥ śubhakṛdyādi labhyate | yāvadvasati viprendro mama bhaktiyuto gṛhe || kāśyāṃ dine dine svarṇakoṭibhāraphalaṃ labhet | dānena yadavāpnoti mahādānakṛtairnaraḥ || tadavāpnoti viprāya śubhe sampādite gṛhe | gṛhadānāccirāyuḥ syāt gṛhadānānmahādyukṛt || gṛhadānādbhavanmukto vaṃśavṛddhistathā'kṣayaḥ | arthakāmādikaṃ sarvaṃ prāpnoti gṛhadānataḥ || vyayīkṛtya dhanaṃ kiñcidatra krītvā bhuvaṃ śubhām | gṛhamutthāpya yo dadyāt sa yāti paramaṃ padam || māṃ vinā kaḥ prayaccheta kāśyāṃ bhūmiṃ dvijāya hi | tasmānmadaṃśaḥ samprokto gṛhadānānna saṃśayaḥ || upapātakakṣāṇi mahāpāpaśatāni ca | vilayaṃ yānti sarvāṇi kṣetramadhye kṛtānyapi || tathā tatraiva, śivāyatanalakṣāṇi viṣṇorāyatanāni ca | kṛtāni tena viprendra sthāpito brāhmaṇo yadi || vipre susthāpite kāśyāṃ trailokyaṃ sthāpitaṃ bhavet | trailokye sthāpite viprāḥ prīye'haṃ sacarācaram || tasmāt kiñcit yathāśaktyā kuryādvipro yathā vaset | kṣetre kṛtānāṃ pāpānāṃ prāyaścittamidaṃ smṛtam || iti | athāntargṛhayātrā | kāśīkhaṇḍe, antargṛhasya yātrā vai karttavyā prativatsaram