Tirthaprakasha 4.p189
Tīrthaprakāśa 4.p189
- Language
- Sanskrit
4.p189
dviśveśvarapūjāyāḥ sahasrahemakamalapūjājanyaphalasamaṃ phalaṃ, pañcāmṛtādighaṭitamahāpūjāyāṃ tu puruṣārthacatuṣṭayasiddhiḥ phalaṃ, trirātravāse sarvapāpakṣayaḥ, māsavāse tu samyakcīrṇādivyapāśupatavrataphalasamaphalamiti | kāśīkhaṇḍe, mānasānyapi bhaumāni nānātīrthādikāni ca | ityādikamabhidhāya - etāni yāni tīrthāni kāśīprāptikarāṇi ca | iti | tatra yathāśruta evārthaḥ | atha vā etāni snānādinā svargādivat kāśīprāptimapi janayantītyartha iti | iti śrīmatsakalasāmantacakracūḍāmaṇimarīcimañjarīnīrājitacaraṇakamalaśrīmanmahārājādhirājapratāparudratanūjaśrīmanmahārājamadhukarasāhasūnuśrīmanmahārājādhirājacaturudadhivalayavasundharāhṛdayapuṇḍarīkavikāsadinakaraśrīvīrasiṃhodyojitaśrīhaṃsapaṇḍitātmajaśrīparaśurāmamiśrasūnusakalavidyāpārāvārapārīṇadhurīṇajagaddāridyamahāgajapārīndravidvajjanajīvātuśrīmanmitramiśrakṛte vīramitrodayanibandhe tīrthaprakāśe kāśīparicchedaḥ samāptaḥ | atha prayāgamāhātmyam | tatra śrutiḥ, sitāsite sarite yatraṃ saṅgate tatrāplutāso divamutpatanti | ye vai tanvāṃ visṛjanti dhīrāste janāso 'mṛtatvaṃ bhajante || iti | mahābhārate āraṇyakaparvaṇi pulastyatīrthayātrāyām | tato gaccheta rājendra prayāgamṛṣisaṃstutam | yatra brahmādayo devā diśaśca sadiṃgīśvarāḥ || lokapālāśca siddhāśca niyatāḥ pitarastathā | sanatkumārapramukhāstathaiva ca maharṣayaḥ || aṅgiraḥpramukhāścaiva tathā brahmarṣayo'pare | tathā nāgāḥ suparṇāśca siddhāścakradharāstathā || saritaḥ sāgarāścaiva gandharvāpsarasastathā | hariśca bhagavānāste prajāpatipuraskṛtaḥ || tatra trīṇyagnikuṇḍāni teṣāṃ madhye tu jāhnavī | prayāgādabhiniṣkrāntā sarvatīrthapuraskṛtā || tapanasya sutā tatra triṣu lokeṣu viśrutā | yamunā gaṅgayā sārddhaṃ saṅgatā lokabhāvinī || gaṅgāyamunayormadhyaṃ pṛthivyā jaghanaṃ smṛtam | prayāgaṃ jaghanasyāntamupasthamṛṣayo viduḥ || prayāgaṃ sapratiṣṭhānaṃ kambalāśvatarāvubhau | tīrthaṃ bhogavatī caiva vedī proktā prajāpateḥ || tatra vedāśca yajñāśca mūrttimanto yudhiṣṭhira ! | prajāpatimupāsanta ṛṣayaśca mahāvratāḥ || yajante kratubhirdevāṃstathā cakradharā nṛpāḥ | tataḥ puṇyatamaṃ nāsti triṣu lokeṣu bhārata !