Tirthaprakasha 4.p219

4.p219

atha māghasaptamī | aruṇodayavelāyāṃ śuklā māghasya saptamī | gaṅgāyāṃ yadi labhyeta sūryagrahaśataiḥ samā || iti | atha yugādyādisnānam | bhaviṣye, saṃvatsaraphalaṃ tasya navamyāṃ kārttike tathā | manvādau ca yugādau ca māsatrayaphalaṃ labhet || iti | atha dinakṣayasnānam | skāndabhaviṣyayoḥ, amāvāsyāṃ śataguṇaṃ sahasraṃ tu dinakṣaye | iti | atha nakṣatrasnānam | brahmāṇḍe, saṅkrāntiṣu vyatīpāte grahaṇe candrasūryayoḥ | puṣye snātvā tu gaṅgāyāṃ kulakoṭīḥ samuddharet || iti | atha yogasnānam | gāruḍabhaviṣyayoḥ, puṣye vā janmanakṣatre vyatīpāte ca vaidhṛtau | amāvāsyāṃ nadīsnānaṃ hatyājanmaduṣkṛtam || iti | atha tithivārayogasnānam | skānde, śanaiścarasya vāreṇa vāreṇāṅgārakasya ca | kṛṣṇāṣṭamīcaturdaśyoḥ puṇyāṃ gatimavāpnuyāt || tathā, somavāre tvamāvāsyā ādityāhe ca saptamī | caturthī bhaumavāre ca aṣṭamī ca bṛhaspatau || atra yat kriyate pāpamathavā dharmasañcayaḥ | ṣaṣṭivarṣasahasrāṇi pratijanma tadakṣayam || tathā, sinīvālī kuhūścaiva yadi somadine bhavet | gosahasraphalaṃ dadyāt snānaṃ yanmauninā kṛtam || iti | atha daśaharāsnānam | gāṅgeyagranthe, jyeṣṭhe māsi kṣitisutadine śuklapakṣe daśamyāṃ haste śailānnirgamadiyaṃ jāhnavī martyaloke | pāpānyasyāṃ harati hi tithau sā daśetyāhurāyāḥ puṇyaṃ dadyādapi daśaguṇaṃ vājimedhāyutasya || iti | atha vāruṇīsnānam | smṛtau, vāruṇena samāyuktā madhau kṛṣṇā trayodaśī | gaṅgāyāṃ yadi labhyeta sūryyagrahaśataiḥ samā || iti | atha saṅkrāntisnānam | mātsye, ayane koṭiguṇitaṃ lakṣaṃ viṣṇupadīṣu ca | ṣaḍaśītisahasraṃ tu ṣaḍaśītyāmudāhṛtam || śatamindukṣaye puṇyaṃ sahasraṃ tu dinakṣaye | iti | atha mahājyaiṣṭīsnānam | bhaviṣye, mahājyaiṣṭī suraśreṣṭha kṛtānantaphalaṃ smṛtā | tasyāṃ tu jāhnavīsnānaṃ sūryyagrahaśatādhikam || atha śivasannihitagaṅgāsnānam | bhaviṣye, anantaṃ śivasannidhau | iti | atha grahaṇasnānam | gāruḍe, candrasūryyagrahe caiva yo'vagāheta jāhnavīm | sa snātaḥ sarvatīrtheṣu kimarthamaṭate mahīm || brāhme, indorlakṣaguṇaṃ proktaṃ raverdaśaguṇaṃ tathā | gaṅgātīre tu samprāpte indoḥ koṭī raverdaśa || gāruḍe, sūryyagrahaḥ sūryyavāre some candragrahastathā | cūḍāmaṇirayaṃ yogastatrānantaphalaṃ labhet || anyasmādgrahaṇātkoṭiguṇamatra phalaṃ labhet | iti | atha māsasnānam | nairantaryeṇa gaṅgāyāṃ māsaṃ yaḥ snāti mānavaḥ | sa śakraloke suciraṃ kālaṃ sthitvā sagotrajaiḥ || tato brahmapade tiṣṭhetkalpakoṭiśatāyutam | iti | atha vaiśākhasnānam | vaiṣṇavāmṛte vyāsaḥ, gavāmarddhaprasūtānāṃ lakṣaṃ dattvā tu yatphalam | tatphalaṃ labhate vīra meṣe snātvā tu jāhnavīm || iti | atha tarpaṇam | bhaviṣye, patitādīnabhidhāya | ye narā duḥkhitāḥ samyaksarve te sakuśaistilaiḥ | tarpitā jāhnavītoye nareṇa vidhinā sakṛt || te'pi mokṣaṃ prapadyante yathā brahmā'bravīdvacaḥ | iti | atha pūjā | bhaviṣye, caturbhujāṃ trinetrāṃ ca sarvāvayavaśobhitām | ratnakumbhasitāmbhojavaradābhayasatkarām || śvetavastraparīdhānāṃ muktāmaṇivibhūṣitām | tato dhyāyetsurūpāṃ ca candrāyutasamaprabhām || cāmarairvījyamānāṃ ca śvetacchatropaśobhitām | suprasannāṃ suvadanāṃ karuṇārdranijāntarām || sudhāplāvitabhūpṛṣṭhāṃ divyagandhānulepanām | trailokyanamitāṃ gaṅgāṃ devādibhirabhiṣṭutām || divyarūpavibhūṣāṃ ca divyamālyānulepanām | dhyātvā jale yathā proktāṃ tathāārcāyāṃ tu pūjayet || tathā kāmyānavāpnoti kāmyārādhanato'pi ca | māsārddhamapi yastvevaṃ nairantaryeṇa pūjayet || sa eva puruṣaśreṣṭho nairantaryaṃ hi duṣkaram | evaṃ ca bahukālaṃ yo nairantaryeṇa pūjayet || tasya puṇyaphalaṃ vaktuṃ vāgīśo'pi na hi kṣamaḥ