Tirthaprakasha 4.p256

4.p256

sṛṣṭirantargataṃ yasmāt phalgutīrthe na niṣphalam | tīrthāni yāni sarvāṇi bhuvaneṣvakhileṣu ca || tāni snātuṃ samāyānti phalgutīrthe suraiḥ saha | gaṅgā pādodakaṃ viṣṇoḥ phalgusttvādigadādharaḥ | svayaṃ hi dravarūpeṇa tasmādgaṅgādhikāṃ viduḥ || aśvamedhasahasrāṇāṃ sahasraṃ yaḥ samācaret | nāsau tatphalamāpnoti phalgutīrthe yadāpnuyāt || phalgutīrthe viṣṇujale karomi snānamādṛtaḥ | pitṝṇāṃ viṣṇulokāya bhuktimuktiprasiddhaye || phalgutīrthe naraḥ snātvā tarpaṇaṃ śrāddhamācaret | sapiṇḍakaṃ svasūtroktaṃ namedatha pitāmaham || onnamaḥ śivāya devāya īśānapuruṣāya ca | aghoravāmadevāya sadyojātāya śambhave || natvā pitāmahaṃ devaṃ mantreṇānena pūjayet | phalgutīrthe naraḥ snātvā dṛṣṭvā devaṃ gadādharam || ātmānaṃ pitṛbhiḥ sārddhaṃ tannayedvaiṣṇavaṃ puram | onnamo vāsudevāya namaḥ saṅkarṣaṇāya ca || pradyumnāyāniruddhāya śrīdharāya ca viṣṇave | pañcatīrthyāṃ naraḥ snātvā brahmalokaṃ nayetpitṝn || amṛtaiḥ pañcabhiḥ snānaṃ puṣpavastrādyalaṅkṛtim | na kuryādyo gadāpāṇestasya śrāddhamanarthakam || iti