Tirthaprakasha 4.p274

4.p274

oṃ araṇye vartmani raṇe kṣudhayā tṛṣṇayā hatāḥ | bhūtapretapiśācāśca tebhyaḥ piṇḍaṃ dadāmyaham || 8 || oṃ raurave cāndhatāmiśre kālasūtre ca ye mṛtāḥ | teṣāmuddharaṇārthāya imaṃ piṇḍaṃ dadāmyaham || 9 || oṃ anekayātanāsaṃsthāḥ pretaloke ca ye gatāḥ | teṣāmuddharaṇārthāya imaṃ piṇḍaṃ dadāmyaham || 10 || oṃ anekayātanāsaṃsthā ye nītā yamakiṅkaraiḥ | teṣāmuddharaṇārthāya imaṃ piṇḍaṃ dadāmyaham || 11 || oṃ narakeṣu samasteṣu yātanāsu ca ye sthitāḥ | teṣāmuddharaṇārthāya imaṃ piṇḍaṃ dadāmyaham || 12 || oṃ paśuyonigatā ye ca pakṣikīṭasarīsṛpāḥ | athavā vṛkṣayonisthāstebhyaḥ piṇḍaṃ dadāmyaham || 13 || oṃ jātyantarasahasreṣu bhramantaḥ svena karmaṇā | mānuṣyaṃ durlabhaṃ yeṣāṃ tebhyaḥ piṇḍaṃ dadāmyaham || 14 || oṃ divyantarikṣabhūmiṣṭhāḥ pitaro bāndhavādayaḥ | mṛtā ye'saṃskṛtā ye ca tebhyaḥ piṇḍaṃ dadāmyaham || 15 || ye kecitpretarūpeṇa varttante pitaro mama | te sarve tṛptimāyāntu piṇḍadānena sarvadā || 16 || ye bāndhavābāndhavā ye ye'nyajanmani bāndhavāḥ | teṣāṃ piṇḍo mayā datto hyakṣayyamupatiṣṭhatām || 17 || pitṛvaṃśe mṛtā ye ca mātṛvaṃśe ca ye mṛtāḥ | guruśvaśurabandhūnāṃ ye cānye bāndhavā mṛtāḥ || ye me kule luptapiṇḍāḥ putradāravivarjitāḥ | kriyālopagatā ye ca jātyandhāḥ paṅgavastathā || virūpā āmagarbhāśca jñātājñātāḥ kule mama | teṣāṃ piṇḍo mayā datto hyakṣayyamupatiṣṭhatām || 18 || ābrahmaṇo ye pitṛvaṃśajātā mātustathā vaṃśabhavā madīyāḥ | kuladvaye ye mama dāsabhūtā bhṛtyāstathaivāśritasevakāśca || mitrāṇi sakhyaḥ paśavaśca vṛkṣā dṛṣṭāpyadṛṣṭāśca kṛtopakārāḥ | janmāntare ye mama dāsabhūtāstebhyaḥ svadhā piṇḍamahaṃ dadāmi 19