Tirthaprakasha 4.p30

4.p30

bhārataṃ prathamaṃ varṣaṃ tataḥ kiṃpuruṣaṃ smṛtam | harivarṣaṃ tathaivānyanmerordakṣiṇato dvija || ramyakaṃ cottaraṃ varṣaṃ tathaivānu hiraṇmayam | uttarāḥ kuravaścaiva yathā vai bhārataṃ tathā || navasāhasramekaikameteṣāṃ dvijasattama | ilāvṛtaṃ ca tanmadhye sauvarṇo merurucchritaḥ || meroścaturdiśaṃ tatra navasāhasravistṛtam | ilāvṛtaṃ mahābhāga catvāraścātra parvatāḥ || viṣkambhā racitā meroryojanāyutamucchritāḥ | pūrveṇa mandaro nāma dakṣiṇe gandhamādanaḥ || vipulaḥ paścime pārśve supārśvaścottare smṛtaḥ | kadambasteṣu jambūśca pippalo vaṭa eva ca || ekādaśaśatāyāmāḥ pādapā giriketavaḥ | jambūdvīpasya sā jambūurnāmaheturmahāmune || mahāgajapramāṇāni jambvāstasyāḥ phalāni vai | patanti bhūbhṛtaḥ pṛṣṭhe śīryamāṇāni sarvataḥ || rasena teṣāṃ prakhyātā tatra jambūnadīti vai | saritpravartate sā ca pīyate tannivāsibhiḥ || na svedo na ca daurgandhyaṃ na jarā nendriyakṣayaḥ | tatpānasusthamanasāṃ janānāṃ tatra jāyate || tīramṛttadrasaṃ prāpya sukhavāyuviśoṣitāṃ | jāmbūnadākhyaṃ bhavati suvarṇaṃ siddhabhūṣaṇam