Tirthaprakasha 4.p56

4.p56

vyāsasya darśanaṃ dattvā kṛtvā veṣaṃ tu mānuṣam | ehyehi bhagavan sādho bhikṣāṃ grāhaya sattama || asmadgṛhe kadācittvaṃ nāgato'si mahāmune | etacchrutvā prītamanā bhikṣāṃ grahītumāgataḥ || bhikṣāṃ dattvā tu vyāsāya ṣaḍrasāmṛtopamām | anāsvāditapūrvā sā bhakṣitā muninā tataḥ || bhikṣāṃ vyāsamṛto bhuktvā cintayan hṛṣṭamānasaḥ | vyāsaḥ kamalapatrākṣa idaṃ vacanamabravīt || devo devī nadī gaṅgā miṣṭamannaṃ śubhā gatiḥ | vārāṇasyāṃ viśālākṣi vāsaḥ kasya na rocate || evamuktvā tato vyāso nagarīmavalokayan | cintayaṃścāpi tāṃ bhikṣāṃ hṛdayānandakāriṇīm || apaśyatpurato devaṃ devīṃ ca girijāṃ tadā | gṛhāṅgaṇasthitaṃ vyāsaṃ devadevo'bravīdidam || iha kṣetre na vastavyaṃ krodhanastvaṃ mahāmune | evaṃ samayamāpanno devaṃ vyāso'bravīdvacaḥ || vyāsa uvāca | caturdaśyāṃ tathāṣṭamyāṃ praveśaṃ dātumarhasi