Vratakhanda 109.p1.8

109.p1.8

silhakaṃ vijayaṃ dhūpaṃ mahiṣākhyaṃ ca guggulam
ya evaṃ pūjayeddevaṃ śaṅkaraṃ tripurāntakam
khamekamekaṃ viprendra sa yāti paramaṃ padam
brāhmaṇān pūjayedyastu vācakaṃ ca viśeṣataḥ
mahādevasya vai bhaktān bhaktyā pāśupatān dvijān
evaṃ yaḥ kurute śrāddhamaṣṭamyāmuṣṭakāsu ca
pūjayitvā sureśānaṃ śivaviprairmanīṣibhiḥ
tṛpyanti pitarastasya varṣāṇi daśapañcakam
divyāni muniśārdūla saptasapta ca sapta ca
ya evaṃ pālayedbhaktyā kṛṣṇāṣṭamyāṃ vrataṃ paraṃ
yaṃ yaṃ kāmamabhīpsita taṃ taṃ prāpnoti mānavaḥ
putrakāmo labhet putraṃ dhanakāmo dhanāni ca
vidyārthī labhate vidyāṃ kanyārthī kanyakāṃ parām
dūti bhaviṣyapurāṇoktaṃ śivakṛṣṇāṣṭamīvratam
atha kṛṣṇāṣṭamīvratam
devyuvāca
kṛṣṇāṣṭamyāṃ vidhānaṃ vai nikhilaṃ kriyate tathā
krameṇa me tathā brūhi tat karttavyaṃ sureśvara
īśvara uvāca
hemante tvatha samprāpte māsi mārgaśire tathā
naktaṃ kṛtvā śucirbhūtvā gomūtraṃ prāśayenniśi
kṛṣṇāṣṭamyāṃ vidhānaṃ vai śaṅkaraṃ pūjya bhaktitaḥ
atirātrasya yajñasya phalamaṣṭaguṇaṃ bhavet
smarecca śaṅkaraṃ nāma sāyaṃ rātrau divā yathā
pauṣe gavyaṃ ghṛtaṃ prāśya naktaṃ kṛtvā tu mānavaḥ
bhaktyā tu pūjayecchambhuṃ bhāvitastutitatparaḥ
vājapeyāṣṭakaṃ puṇyaṃ labhate nātra saṃśayaḥ
māghe māheśvaraṃ nāma kṣīraprāśanamādiśet
anāhāraḥ svapedrātrau śaṅkaraṃ pūjya bhaktitaḥ
nāma japtvā maheśasya gomedhāṣṭakamāpnuyāt
phālgune tu mahādevaṃ kṛṣṇāyāṃ parikīrttayet
tilān prāśya anāhārī niśi japtyā samāhitaḥ
japannāmātha devasya saṃsmaran śaṅkaraṃ tathā
rājasūyasya yajñasya phalamaṣṭaguṇaṃ bhavet