Vratakhanda 114.p2.32

114.p2.32

upavāsantu tasyāṃ ca yaḥ karoti mahatphalaṃ
tasyāṃ jagatpatirdevaḥ sarvvalokeśvaro hariḥ
pratyakṣatāṃ prayātyāśu tadanantaphalaṃ kṛtaṃ
sagareṇa kakutsthena dhundhumāreṇa gādhinā
tasyā mārādhito devo dattavānakhilāṃ bhuvaṃ
upavāsaṃstu tasyāñca deva ārādhitaḥ sa ca
tasmai sa rājyamakhilaṃ samṛddhe bhuvi dattavān
vācikān mānasāṃścaiva kāyikāṃśca viśeṣataḥ
saptajanmakṛtaṃ pāpaṃ mucyate nātra saṃśayaḥ
imāmekā mupoṣyaiva puṣya nakṣatrasaṃyutāṃ
ekādaśīsahasreṇa phalaṃ prāpnotyasaṃśayaṃ
snānaṃ dānaṃ japo homaḥ svādhyāyadevatārcanaṃ
yadasyāṃ kriyate kiñcittatsarvvaṃ cākṣayaṃ bhavet
puruṣaistu prayatnena karttavyā phalakāṃkṣibhiḥ
phālgune ca viśeṣeṇa viśeṣaḥ kathito nṛpa
āmarlakīvrataṃ puṇyaṃ viṣṇulokaphalapradaṃ
āmarlakīmadho gatvā jāgaraṃ tatra kārayet
kṛtvā tu jāgaraṃ viṣṇorgosahasraphalaṃ labhet
māndhātā uvāca
āmalakī kadā hyeṣā utpannā dvijasattama
etatsarvvaṃ samācakṣva paraṃ kautūhalaṃ hi me
kaśādityaṃ pavitrā ca kaśrātmāpapraṇāśanī
kacāṅkāgaraṇaṃ kṛtvā gosahasraphalaṃ labhet
vasiṣṭha uvāca
kathayāmi mahābhāga gaccheyaṃ bhagavān citau
āmalakyā mahāvṛkṣaḥ sarvvapāpapraṇāśanaḥ
ekārṇave purā jāte naṣṭe sthāvarajaṅgame
naṣṭe devāsuragaṇe pranaṣṭoragarākṣase
tatra devādhideveśaḥ paramātmā sanātanaḥ
jajāpa paramaṃ brahma cātmanaḥ padamavyayaṃ
tatosya japato brahma mukhācchaśisamaprabhaḥ
ṣṭhīvanādvindusambhūtaḥ sa bhūmau nipapāta ha
tasmādvindoḥ samutpannaḥ svayaṃ dhātrīnago mahān
śākhāpraśākhābahulā phalabhārāvanāmitaḥ
sarvveṣāṃ caiva vṛkṣāṇāṃ ādireṣa prakīrttitaḥ