Vratakhanda 114.p2.33

114.p2.33

etasminneva kāle tu sasṛje bahudhāḥ prajāḥ
brāhmaṇānasṛjattena saṃsṛṣṭāśca imāḥ prajāḥ
devadānavagandharvvā yakṣarākṣasapannagāḥ
tāṃśca dṛṣṭvā mahābhāga paraṃ vismayamāgatāḥ
najānīya imān vṛkṣān cintayānopi sarvvataḥ
evaṃ cintayatasteṣāṃ vāguvācāśarīriṇī
sañjātā vaiṣṇavī tatra ṛṣīṇāṃ pratibodhanī
asṛjadbhagavāgdeva ṛṣayastu tathāmarāḥ
ajitāyāśca yannāste dhārā vai viṣṇusambhavā
āmalakī nago hyeṣa pravaro lokaviśrutaḥ
viṣṇo rniṣṭhīvanājjātaḥ pravaro vaiṣṇavo nagaḥ
tasmātsarvvaprayatnena sevyā āmalakī sadā
sarvvapāpaharā proktā vaiṣṇavī pāpanāśanī
asyā mūle sthito viṣṇu rūrddhaicaiva pitāmahaḥ
skandhe ca bhagavān rudraḥ saṃsthitastripurātmakaḥ
śākhāsu saritaḥsarvvāḥ praśākhāsu ca devatāḥ
parṇeṣu vasavo devāḥ puṣpeṣu marutastathā
prajānāṃpatayaḥ sarvve phalecaiva vyavasthitāḥ
sarvvadevamayī hyeṣā dhātrī ca kathitā mayā
tasmāt pūjyatamā hyeṣā viṣṇubhaktiparāyaṇaiḥ
ṛṣiruvāca
ko bhavānnahi jānāmi akasmādvada he śubhaḥ
devovā yadi vā cānyaḥ kathayasva yathātathaṃ
vāguvāca
yaḥ karttā sarvvalokānāṃ bhuvanānāṃ caturddaśa
anaṅgāṅgavapuḥprekṣya so'haṃ viṣṇuḥ sanātanaḥ
tacchrutvā tasya devasya bhāṣitaṃ brāhmaṇāḥ sthitāḥ
vismayotphullanayanāḥ paraṃ vismayamāgatāḥ
anādinidhanaṃ devaṃstotuñcaiva pracakramuḥ
oṃ namo bhūtātmane ca bhūtāya paramātmane
avyaktāya namo nityaṃ anantāya namonamaḥ
dāmodarāya śucaye yajñeśāya namonamaḥ
namo māyāpaṭacchannajagadvācaumahātmane
acyutāya namo nityaṃ anantāya namonamaḥ
evaṃ stutastadā taiśca tutoṣa bhagavān hariḥ