Devirahasya 44.2-2.2

44.2-2.2

iḍayā piba ṣoḍaśabhiḥ pavanaṃ caturuttaraṣaṣṭitamābhyadhikam
tyaja piṅgalayā śanakaiḥ śanakairdaśabhirdaśabhirdaśabhirghyadhikaiḥ
pūrakaḥ 16 , kumbhakaḥ 64 , recakaḥ 32 , iti triḥ kṛtvā ,
ūm̐juṃsaḥ ātmatattvaṃ śodhayāmi svāhā, ūm̐juṃsaḥ vidyātattvaṃ śodhayāmi
svāhā, ūm̐juṃsaḥ śivatattvaṃ śodhayāmi svāhā, ityācamya, ṣaḍaṅgaṃ
vidhāya, vāmahaste jalaṃ dhṛtvā tattvamudrayācchādya, yaṃraṃvaṃlaṃhaṃ iti
pañcabhūtamantreṇa saptavāramabhimantrya dantahaste dhṛtvā, vāmānāmikāṅguṣṭhayogena tadgalitodakabindubhiḥ svaśiro mūlamuccaran daśadhā prohya punarvāmahaste vidhāya, iḍayāntarnītvā dehāntaḥ pāpaṃ pradāhya, piṅgalayā tajjalaṃ sakaluṣaṃ dantahaste dhṛtvā svavāmabhāgasthakalpitavajraśilāyāmāsphālayedityaghamarṣaṇaṃ vidhāya, pūrvavat ṣaḍaṅgaṃ kṛtvā, oṃ juṃsaḥ paramahaṃsāya vidmahe sohaṃsaḥ mṛtyuñjayāya dhīmahi juṃuṃtanno'mṛteśvaraḥ pracodayāt| iti daśadhā prajapya mūlaṃ ca yathāśaktyā japtvā, gāyatryā devīdevayorarghyatrayaṃ dadyāt| oṃ juṃsaḥ sāṅgāyāmṛteśvarīsahitāya mṛtyuñjayāya eṣa te argho namaḥ| tathā pūrvavat sūryāyārghyatrayaṃ dattvā, jale caturasraṃ satryasraṃ vibhāvya mūlamuccaran saptadhā sadevīkaṃ devaṃ tarpayet| mū0 sāṅgaḥ savāhanaḥ sāyudhaḥ saparicchadaḥ sadevīko mṛtyuñjayo bhagavāṃstṛpyatāmiti santarpya, parivārānekaikāñjalinā santarpya, brahmādikīṭaparyantaṃ santarpya, pitrāditarpaṇaṃ vidhāya, pūrvavad devaṃ saṃhāramudrayā svahṛdi samānīya śivo'hamiti bhāvayan yāgamaṇḍapamāgacchediti saṃdhyāvidhiḥ