Atharvavedabrahmana 13.4

13.4

puruṣo vai yajñaḥ, tasyaśira eva havirdhānaṃ, mukhamāhavanīyaḥ, udaraṃ
sadaḥ, antarukthāni, bāhū mārjālīyaścāgnīdhrīyaśca, yā imā
devatāste antaḥsadaḥ, sanviṣṭhāpratiṣṭhe(1) gārhapatyavrataśravaṇau iti
athāparantasya, mana eva brahmā, prāṇa udgātā, apānaḥ prastotā,
vyānaḥ pratiharttā, vāgghotā, cakṣuradhvaryuḥ, prajāpatiḥ sadasyaḥ,
aṅgāni hotrāśaṃsinaḥ, ātmā yajamānaḥ | tadyadadhvaryu stotramupākaroti somaḥ pavata iti, cakṣureva tat prāṇaiḥ sandadhāti | atha
yat prastotā brahmāṇamāmantrayate, brahman stomyāmaḥ praśāstariti
manograṇīrbhavati eteṣāṃ prāṇānāṃ, manasā hi prasūtāḥ stomena
stayāmeti, prāṇānaiva tat manasā sandadhāti| atha yadbrahmā stutetyuccairanujānāti, mano vai brahmā, mana eva tat prāṇaiḥ sandadhāti
atha yat prastotā prastauti, apānameva tat prāṇaiḥ sandadhāti| atha
yat pratiharttā pratiharati, vyānameva tadapānaiḥ sandadhāti| atha
yadudgātodgāyati, samānameva tat prāṇaiḥ sandadhāti| atha yaddhotā
sāmnā śastramupasantanoti, vāgvai hotā, vācameva tat prāṇaiḥ
sandadhāti| atha yat sadasyo brahmāṇamupāsīdati, prajāpatirvai
sadasyaḥ, prajāpatimevāpnoti| atha yaddhotrāśaṃsinaḥ sāmaṃ santati
kurvanti, aṅgāni vai hotrāśaṃsina, aṅgānyevāsya tat prāṇaiḥ
sandadhāti| atha yadyajamānastotramupāsīdati, ātmā vai yajamānaḥ, ātmānamevāsya tat kalpayati| tasmānnainaṃ vahirvedyabhyāśrāvayeyurnābhyudiyānnābhyastamiyān nādhiṣṇye pratapennet prāṇebhya
ātmānamantaragāditi