Gopathabrahmana 2.2.8
Gopathabrāhmaṇa (ed. Gaastra 1919) 2.2.8
- Language
- Sanskrit
2.2.8
na dvādaśāgniṣṭomasyopasadaḥ syuḥ_
aśāntā nirmṛjyur na tisro 'hīnasya_
upariṣṭād yajñakratur garīyān abhiṣīded yathā gurur bhāro grīvā niḥśṛṇīyād ārtim ārchet_
dvādaśāhīnasya kuryāt
pratyuttabdhyai sayatvāya
tisro 'gniṣṭomasyopasadaḥ syuḥ śāntyā anirmārgāya
te devā asuryān imāṃl lokān nānvavaitum adhṛṣṇuvan_
tān agninā mukhenānvavāyan
yad agnim anty upasadāṃ pratīkāni bhavanti yathā kṣetrapatiḥ kṣetre 'nvavanayaty evam evaitad agninā mukhenemāṃl lokān abhinayanto yanti [ed. 'nvavanayanty, corr. Patyal]
yo ha vai devān sādhyān veda sidhyaty asmai_
ime vāva lokā yat sādhyā devāḥ
sa ya evam etānt sādhyān veda sidhyaty asmai
sidhyaty amuṣmai sidhyaty asmai lokāya ya evaṃvidvān upasadam upaiti || 8 ||