Gopathabrahmana 1.1.2
Gopathabrāhmaṇa 1.1.1–1.3.6 (ed. Mitra and Vidyābhūṣaṇa 1872) 1.1.2
- Language
- Sanskrit
1.1.2
sa bhūyo 'śrāmyad bhūyo 'tapyat bhūya ātmānaṃ samatapat tasya śrāntasya taptasya saṃtaptasya sarvebhyo romagartebhyaḥ pṛthak svedadhārāḥ prāsyandanta / tābhir anandat tad abravīd ābhir vā aham idaṃ sarvaṃ dhārayiṣyāmi yad idaṃ kiṃcābhir vā aham idaṃ sarvaṃ janayiṣyāmi yad idaṃ kiṃcābhir vā aham idaṃ sarvam āpsyāmi yad idaṃ kiṃceti / tad yad abravīd ābhir vā aham idaṃ sarvaṃ dhārayiṣyāmi yad idaṃ kiṃceti tasmāt dhārā abhavaṃs taddhārāṇāṃ dhārātvaṃ yac cāsu dhriyate / tad yad abravīd ābhir vā aham idaṃ sarvaṃ janayiṣyāmi yad idaṃ kiṃceti tasmāj jāyā abhavaṃs tajjāyānāṃ jāyātvaṃ yac cāsu puruṣo jāyate yac ca putraḥ punnāmanarakam anekaśatatāraṃ tasmāt trāti putras tat putrasya putratvam / tad yad abravīd ābhir vā aham idaṃ sarvam āpsyāmi yad idaṃ kiṃceti tasmād āpo 'bhavaṃs tad apām aptvam āpnoti vai sa sarvān kāmān yān kāmayate //
Other recensions (1)
- Gopathabrāhmaṇa (ed. Gaastra 1919) — Sanskrit