Rigvedabrahmana 24.3

24.3

tatsavirturvareṇyamiti vaiśvāmitro 'nucaraḥ pṛṣṭyānāmeva nānātvāya¹
vājayantaḥ puraṃdhyeti vājavattadetasyāhno rūpamudu ṣya devaḥ savitā damūnā iti sāvitraṃ vāmamadya savitarvāmamu ṣya iti vāmamiti paśumatpaśumaditi vā asya rūpaṃ mahī dyāvāpṛthivī iha jyeṣṭhe iti dyāvāpṛthivīyaṃ ruvaddyocā paprathānebhirevairityucceti paśumatpaśumaditi vā asya
rūpamṛbhurvibhvā vāja indro no acchetyārbhavaṃ ye gomantaṃ vājavantaṃ suvīramiti gomantamiti paśumatpaśumaditi vā asya rūpaṃ ko nu vāṃ
mitrāvaruṇāvṛtāyanniti vaiśvadevaṃ yajjāyate vā paśuṣo na vājāniti
paśuṣa iti paśumatpaśumaditi vā asya rūpamadhyāsavattatpaṅkte rūpaṃ haviṣpāntamajaraṃ svarvidīti vaiśvānarīyaṃ pāntamiti tatpañcamasyāhno rūpaṃ
vapurnu taccikituṣe cidastviti mārutaṃ samānaṃ nāma dhenu patyamānamiti
dhenviti paśumatpaśumaditi vā asya rūpamagnirhotā gṛhapatiḥ sa rājeti jātavedasīyamavā no maghavanvājasātāviti vājavattadetasyāhno
rūpamadhyāsavattatpaṅkte rūpamiti nu vyūḍhe 'tha samūḍhe mūrdhānaṃ divo aratiṃ pṛthivyā iti vaiśvānarīyaṃ nābhiṃ yajñānāṃ sadanaṃ rayīṇāmiti
rayimadrayimaditi vā asya rūpamā rudrāsa indravantaḥ sajoṣasa iti
mārutaṃ gomadaśvāvadrathavatsuvīramiti gomadaśvāvaditi paśumatpaśumaditi vā asya rūpamimamū ṣu vo atithimuṣarbudhamiti jātavedasīyaṃ tasyoktaṃ brāhmaṇaṃ paśūnpañcamenāhnāpnuvanti paṅktiṃ chandastriṇavaṃ stomaṃ
śākvaraṃ sāmāvācīṃ¹ diśaṃ hemantamṛtūnāṃ maruto devāndevajātaṃ rudramadhipatim