Rigvedabrahmana 28.2

28.2

agre tamadyāśvaṃ na stomairityājyaṃ tadetatspṛṣṭaṃ daśamāyāhne na saṃpādayennādriyetātraiva saṃpannaṃ mādhucchandasaḥ praugastasyoktaṃ brāhmaṇaṃ trikadrukeṣu mahiṣo yavāśiraṃ tuviśuṣma ityaticchandasā marutvatīyaṃ pratipadyate
sā saṃpannā catuḥṣaṣṭyakṣarā te dve anuṣṭubhau saṃpadyete bṛhadindrāya gāyata
pra va indrāya bṛhata iti sūktātpūrvī dvau pragāthau pinvantyapīyayā
saṃśaṃṃsatīti tatsaṃpannaṃ janiṣṭhā ugraḥ sahase turāyetyaikāhikaṃ marutvatīyaṃ
pratiṣṭhā vā ekāhaḥ pratiṣṭhityai eva kayā naścitra ābhuvatkayā tvaṃ na
ūtyeti vāmadevyasya yonau rathaṃtaramūhaṃ bhavatyāgneyaṃ sāmaindrīṣu tanmithunaṃ
prajātyai rūpaṃ yāvantaḥ pragāthāstāvantyauṣṇihāni tṛcāni dhāyyāmanyā
dvipadā bhajate saptadaśīmanyā sūktasya tatsaṃpannamindrasya nu vīryāṇi pravocamityaikāhikaṃ niṣkevalyaṃ pratiṣṭhā vā ekāhaḥ pratiṣṭhā daśamamahaḥ pratiṣṭhānīyaṃ vai chando dvipade pratiṣṭhityai evābhi tyaṃ devaṃ savitāramoṇyoḥ
kavikratumityaticchandasā vaiśvadevaṃ pratipadyate sā saṃpannā catuḥṣaṣṭyakṣarā
te dve anuṣṭubhau saṃpadyete abhiṣvānanucarastasyoktaṃ brāhmaṇaṃ tatra purastādānobhadrīyasya prasuktīyaṃ śaṃsati pratiṣṭhā vā ekāhaḥ pratiṣṭhā daśamamahaḥ
pratiṣṭhānīyaṃ vai chando dvipadāḥ pratiṣṭhityai eva virāṅhu vāmadevyamagniṣṭomasāma bhavati śrīrvirāḍannādyaṃ śriyo virājo 'nnādyasyopāptyā atho śāntirvai bheṣajaṃ vāmadevyaṃ śāntirevaiṣā bheṣajamantato yajñe
kriyate