Taittiriyabrahmana 3.12.4.4

3.12.4.4

tám̐ satyám abravīt /
prájāpate satyéna vái śrāmyasi /
ahám u vái satyám asmi /
mā́ṃ nú yajasva /
átha té satyám̐ satyáṃ bhaviṣyati /
ánu svargáṃ lokáṃ vetsyásī́ti /
sá etám āgneyám aṣṭā́kapālaṃ níravapat /
satyā́ya carúm /
ánumatyai carúm /
táto vái tásya satyám̐ satyám abhavat /
ánu svargáṃ lokám avindat /
satyám̐ ha vā́ asya satyáṃ bhavati /
ánu svargáṃ lokáṃ vindati /
yá eténa havíṣā yájate /
yá u ca_enad eváṃ véda /
só 'tra juhoti /
agnáye svā́hā satyā́ya svā́hā /
ánumatyai svā́hā prajā́pataye svā́hā /
svargā́ya lokā́ya svā́hā_agnáye sviṣṭakṛ́te svā́hā_íti //