Pramāṇa · Search · About · API

Taittiriyabrahmana 3.5

Taittirīyabrāhmaṇa 3.5

Language
Sanskrit

Contents

3.5.1.1

satyáṃ prápadye /
ṛtáṃ prápadye /
amṛ́taṃ prápadye /
prajā́pateḥ priyā́ṃ tanúvam ánārtāṃ prápadye /
idám aháṃ pañcadaśena vájreṇa /
dviṣántaṃ bhrā́tṛvyam ávakrāmāmi /
yò 'smā́n dvéṣṭi /
yáṃ ca vayáṃ dviṣmáḥ /
bhū́r bhúvaḥ súvaḥ /
hím //

3.5.2.1

prá vo vā́jā abhídyavaḥ /
havíṣmanto ghṛtā́cyā /
devā́ñ jigāti sumnayúḥ /
ágna ā́yāhi vītáye /
gṛṇānó havyádātaye /
ní hótā satsi barhíṣi /
táṃ tvā samídbhir aṅgiraḥ /
ghṛténa vardhayāmasi /
bṛhát_śocā yaviṣṭhya /
sá naḥ pṛthú śravā́yyam //

3.5.2.2

ácchā deva vivāsasi /
bṛhád agne suvī́ryam /
īḍényo namasyàs, tiráḥ /
támām̐si darśatáḥ /
sám agnír idhyate vṛ́ṣā /
vṛ́ṣo agníḥ sámidhyate /
áśvo ná devavā́hanaḥ /
tám̐ havíśmanta īḍate /
vṛ́ṣaṇaṃ tvā vayaṃ vṛ́ṣan /
vṛ́ṣāṇaḥ sámidhīmahi //

3.5.2.3

ágne dī́dyataṃ bṛhát /
agníṃ dūtáṃ vṛṇīmahe /
hótāraṃ viśvávedasam /
asyá yajñásya sukrátum /
samidhyámāno adhvaré /
agníḥ pāvaká ī́ḍyaḥ /
śocíṣkeśas tám īmahe /
sámiddho agna āhuta /
devā́n yakṣi svadhvara /
tvám̐ hí havyavā́ḍ ási /
ā́juhota duvasyáta /
agníṃ prayaty àdhvaré /
vṛṇīdhvám̐ havyavā́hanam /
tváṃ váruṇa utá mitró agne /
tvā́ṃ vardhanti matíbhir vásiṣṭhāḥ /
tvé vásu suṣaṇanā́ni santu /
yūyáṃ pāta svastíbhiḥ sádā naḥ //

3.5.3.1

ágne mahā́m̐ asi brāhmaṇa bhārata /
ásāv ásau /
deva_íddho mánviddhaḥ /
ṛ́ṣiṣṭuto víprānumaditaḥ /
kaviśastó bráhmasam̐śito ghṛtā́havanaḥ /
praṇī́r yajñā́nām /
rathī́r adhvarā́ṇām /
atū́rto hótā /
tū́rṇir havyavā́ṭ /
ā́spā́traṃ juhū́r devā́nām //
camasó devapā́naḥ /
arā́m̐ ivāgne nemír devā́m̐s tváṃ paribhū́r asi /
ā́vaha devā́n yájamānāya /
agním agna ā́vaha /
sómam ā́vaha /
agním ā́vaha /
prajā́patim ā́vaha /
agnī́ṣómāv ā́vaha /
indrāgnī́ ā́vaha /
índram ā́vaha /
mahendrám ā́vaha /
devā́m̐ ājyapā́m̐ ā́vaha /
agním̐ hotrā́ya_ā́vaha /
sváṃ mahimā́nam ā́vaha /
ā́ cāgne devā́n váha /
suyájā ca yaja jātavedaḥ //

3.5.4.1

agnír hótā, vétv agníḥ /
hotráṃ vetv prāvitrám /
smó vayám /
sādhú te yajamāna devátā /
ghṛtávatīm adhvaryo srúcam ā́syasva /
devāyúvaṃ viśvávārām /
ī́ḍāmahai devā́m̐ īḍényān /
namasyā́ma namasyā́n /
yájāma yajñíyān //

3.5.5.1

samídho agna ā́jyasya viyantu /
tánūnápād agna ā́jyasya vetu /
iḍó agna ā́jyasya viyantu /
barhír agna ā́jyasya vetu /
svā́hā_agním /
svā́hā sómam /
svā́hā_agním /
prajā́patim /
svā́hā_agnī́ṣómau /
svā́hā_indrāgnī́ /
svā́hā_índram /
svā́hā mahendrám /
svā́hā devā́m̐ ājyapā́n /
svā́hā_agním̐ hotrā́j juṣāṇā́ḥ /
ágna ā́jyasya viyantu //

3.5.6.1

agnír vṛtrā́ṇi jaṅghanat /
draviṇasyúr vipanyáyā /
sámiddhaḥ śukrá ā́hutaḥ /
juṣāṇó agnír ā́jyasya vetu /
tvám̐ somāsi sátpatiḥ /
tvám̐ rā́jā_utá vṛtrahā́ /
tváṃ bhadró asi krátuḥ /
juṣāṇáḥ sóma ā́jyasya havíṣo vetu /
agníḥ pratnéna jánmanā /
śúmbhānas tanúvam̐ svā́m /
kavír vípreṇa vāvṛdhe /
juṣāṇó agnír ā́jyasya vetu /
sóma gīrbhíṣ ṭvā vayám /
vardháyāmo vacovídaḥ /
sumṛḍīkó na ā́viśa /
juṣāṇáḥ sóma ā́jyasya havíṣo vetu //

3.5.7.1

agnír mūrdhā́ diváḥ kakút /
pátiḥ pṛthivyā́ ayám /
apā́m̐ rétām̐si jinvati /
bhúvo yajñásya rájasaś ca netā́ /
yátrā niyúdbhiḥ sácase śivā́bhiḥ /
diví mūrdhā́naṃ dadhiṣe suvarṣā́m /
jihvā́m agne cakṛṣe havyavā́ham /
prájāpate ná tvád etā́ny anyáḥ /
víśvā jātā́ni pári tā́ babhūva /
yátkāmās te juhumás tán no astu //

3.5.7.2

vayám̐ syāma pátayo rayīṇā́m /
sá veda putráḥ pitáram̐ sá mātáram /
sá sūnúr bhuvat sá bhuvat púnarmaghaḥ /
sá dyā́m áurṇod antárikṣam̐ sá súvaḥ /
sá viśvā bhúvo abhavat sá ā́bhavat /
ágnīṣomā sávedasā /
sáhūtī vanataṃ gíraḥ /
sáṃ devatrā́ babhūvathuḥ /
yuvám etā́ni diví rocanā́ni /
agníś ca soma sákratū adhattam //

3.5.7.3

yuvám̐ síndhūm̐r abhíśaster avadyā́t /
ágnīṣomāv ámuñcataṃ gṛbhītā́n /
índrāgnī rocanā́ diváḥ /
pári vā́jeṣu bhūṣathaḥ /
tád vāṃ ceti prá vīryàm /
śnáthad vṛtrám utá sanoti vā́jam /
índrā yó agnī́ sáhurī saparyā́t /
irajyántā vasavyàsya bhū́reḥ /
sáhastamā sáhasā vājayántā /
ā́_indra sānasím̐ rayím //

3.5.7.4

sajítvānam̐ sadāsáham /
várṣiṣṭham ūtáye bhara /
prá sasāhiṣe puruhūta śátrūn /
jyéṣṭhas te śúṣma ihá rātír astu /
índra_ā́bhara dákṣiṇenā vásūni /
pátiḥ síndhūnām asi revátīnām /
mahā́m̐ índro yá ójasā /
parjányo vṛṣṭimā́m̐ iva /
stómair vatsásya vāvṛdhe /
mahā́m̐ índro nṛvád ā́ carṣaṇiprā́ḥ //

3.5.7.5

utá dvibárhā amináḥ sáhobhiḥ /
asmadríyag vāvṛdhe vīryā̀ya /
urúḥ pṛthúḥ súkṛtaḥ kartṛ́bhir bhūt /
piprīhí devā́m̐ uśató yaviṣṭha /
vidvā́m̐ ṛtū́m̐r ṛtupate yaja_ihá /
yé dáivyā ṛtvíjas tébhir agne /
tvám̐ hótṝṇām asy ā́yajiṣṭhaḥ /
agním̐ sviṣṭakṛ́tam /
áyāḍ agnír agnéḥ priyā́dhā́māni /
áyāṭ sómasya priyā́ dhā́māni //

3.5.7.6

áyāḍ agnéḥ priyā́ dhā́māni /
áyāṭ prajā́pateḥ priyā́ dhā́māni /
áyāḍ agnī́ṣómayoḥ priyā́ dhā́māni /
áyāḍ indrāgniyóḥ priyā́ dhā́māni /
áyāḍ índrasya priyā́ dhā́māni /
áyāṇ mahendrásya priyā́ dhā́māni /
áyāḍ devā́nām ājyapā́nāṃ priyā́ dhā́māni /
yákṣad agnér hótuḥ priyā́ dhā́māni /
yákṣat sváṃ mahimā́nam /
ā́yajatām éjyā íṣaḥ /
kṛṇótu só adhvarā́ jātávedāḥ /
juṣátām̐ havíḥ /
ágne yád adyá viśó adhvarasya hotaḥ /
pā́vakaśoce véṣ ṭvám̐ hí yájvā /
ṛtā́ yajāsi mahinā́ ví yád bhū́ḥ /
havyā́ vaha yaviṣṭha yā́ te adyá //

3.5.8.1

úpahūtam̐ rathaṃtarám̐ sahá pṛthivyā́ /
úpa mā rathaṃtarám̐ sahá pṛthivyā́ hvayatām /
úpahūtaṃ vāmadevyám̐ sahá_antárikṣeṇa /
úpa mā vāmadevyám̐ sahá_antárikṣeṇa hvayatām /
úpahūtaṃ bṛhát sahá divā́ /
úpa mā bṛhát sahá divā́ hvayatām /
úpahūtāḥ saptá hótrāḥ /
úpa mā saptá hotrā hvayantām /
úpahūtā dhenúḥ sahá_ṛṣabhā /
úpa mā dhenúḥ sahá_ṛṣabhā hvayatām //

3.5.8.2

úpahūto bhakṣáḥ sákhā /
úpa mā bhakṣáḥ sákhā hvayatām /
úpahūtā́3ṃ hó /
íḍā_úpahūtā /
úpahūtā_íḍā /
úpo asmā́m̐ íḍā hvayatām /
íḍā_úpahūtā /
úpahūtā_íḍā mānavī́ ghṛtápadī maitrāvaruṇī́ /
bráhma devákṛtam úpahūtam //

3.5.8.3

dáivyā adhvaryáva úpahūtāḥ /
úpahūtā manuṣyā̀ḥ /
yá imáṃ yajñám ávān /
yé yajñápatiṃ várdhān /
úpahūte dyā́vāpṛthivī́ /
pūrvajé ṛtā́varī /
devī́ deváputre /
úpahūto 'yáṃ yájamānaḥ /
úttarasyāṃ devayajyā́yām úpahūtaḥ /
bhū́yasi haviṣkáraṇa úpahūtaḥ /
divyé dhā́mann úpahūtaḥ /
idáṃ me devā́ havír juṣantām íti tásminn úpahūtaḥ /
víśvam asya priyam úpahūtam /
víśvasya priyásya_úpahūtasya_úpahūtaḥ //

3.5.9.1

deváṃ barhíḥ /
vasuváne vasudhéyasya vetu /
devó nárāśám̐saḥ /
vasuváne vasudhéyasya vetu /
devó agníḥ sviṣṭakṛ́t /
sudráviṇā mandráḥ kavíḥ /
satyámanmā_āyajī́ hótā /
hótur_hotur ā́yajīyān /
ágne yā́n devā́n ayāṭ /
yā́m̐ ápipreḥ /
yé te hotré ámatsata /
tā́m̐ sasanúṣīm̐ hótrāṃ devaṃgamā́m /
diví devéṣu yajñám éraya_imam /
sviṣṭakṛ́c cā́gne hótā_ábhuḥ /
vasuváne vasudhéyasya namovāké vī́hi //

3.5.10.1

idáṃ dyāvāpṛthivī bhadrám abhūt /
ā́rdhma sūktavākám /
utá namovākám /
ṛdhyā́sma sūktócyam agne /
tvám̐ sūktavā́g asi /
úpaśrito diváḥpṛthivyóḥ /
ómanvatī te 'smín yajñé yajamāna dyā́vāpṛthivī́ stām /
śaṃgayé jīrádānū /
átrasnū ápravede /
urúgavyūtī abhayaṃkṛ́tau //

3.5.10.2

vṛṣṭídyāvā rītyā̀pā /
śambhúvau mayobhúvau /
ū́rjasvatī ca páyasvatī ca /
sūpacaraṇā́ ca svadhicaraṇā́ ca /
táyor āvídi /
agnír idám̐ havír ajuṣata /
ávīvṛdhata máho jyā́yo 'kṛta /
sóma idám̐ havír ajuṣata /
ávīvṛdhata máho jyā́yo 'kṛta /
agnír idám̐ havír ajuṣata //

3.5.10.3

ávīvṛdhata máho jyā́yo 'kṛta /
prajā́patir idám̐ havír ajuṣata /
ávīvṛdhata máho jyā́yo 'kṛta /
agnī́ṣómāv idám̐ havír ajuṣetām /
ávīvṛdhetāṃ máho jyā́yo 'krātām /
indrāgnī́ idám̐ havír ajuṣetām /
ávīvṛdhetāṃ máho jyā́yo 'krātām /
índra idám̐ havír ajuṣata /
ávīvṛdhata máho jyā́yo 'kṛta /
mahendrá idám̐ havír ajuṣata //

3.5.10.4

ávīvṛdhata máho jyā́yo 'kṛta /
devā́ ājyapā́ ā́jyam ajuṣanta /
ávīvṛdhanta máho jyā́yo 'krata /
agnír hotréṇa_idám̐ havír ajuṣata /
ávīvṛdhata máho jyā́yo 'kṛta /
asyā́m ṛ́dhad dhótrāyāṃ devaṃgamā́yām /
ā́śāste 'yáṃ yájamāno 'sáu /
ā́yur ā́śāste /
suprajāstvám ā́śāste /
sajātavanasyā́m ā́śāste //

3.5.10.5

úttarāṃ devayajyā́m ā́śāste /
bhū́yo haviṣkáraṇam ā́śāste /
divyáṃ dhā́ma_ā́śāste /
víśvaṃ priyám ā́śāste /
yád anéna havíṣā_ā́śāste /
tád aśyāt tád ṛdhyāt /
tád asmai devā́ rāsantām /
tád agnír devó devébhyo vánate /
vayám agnér mā́nuṣāḥ /
iṣṭáṃ ca vītáṃ ca /
ubhé ca no dyā́vāpṛthivī́ ám̐hasaḥ pātām /
ihá gatir vām ásya_idáṃ ca /
námo devébhyaḥ //

3.5.11.1

tát_śaṃyór ā́vṛṇīmahe /
gātúṃ yajñā́ya /
gātúṃ yajñápataye /
dáivī svastír astu naḥ /
svastír mā́nuṣebhyaḥ /
ūrdhváṃ jigātu bheṣajám /
śaṃ no astu dvipáde /
śáṃ cátuṣpade //

3.5.12.1

ā́pyāyasva, sáṃ te, /
ihá tváṣṭāram agriyáṃ, tán nas turī́pam, /
devā́nāṃ pátnīr uśatī́r avantu naḥ /
prā́vantu nas tujáye vā́jasātaye /
yā́ḥ pā́rthivāso yā́ apā́m ápi vraté /
tā́ no devīḥ suhavāḥ śárma yacchata /
utá gnā́ viyantu devápatnīḥ /
indrāṇy àgnā́yy aśvínī rā́ṭ /
ā́ ródasī varuṇānī́ śṛṇotu /
viyántu devī́r yá ṛtúr jánīnām //

3.5.12.2

agnír hótā gṛhápatiḥ sá rā́jā /
víśvā veda jánimā jātávedāḥ /
devā́nām utá yó mártyānām /
yájiṣṭhaḥ sá práyajatām ṛtā́vā /
vayám u tvā gṛhapate jánānām /
ágne ákarma samídhā bṛhántam /
asthūríṇo gā́rhapatyāni santu /
tigména nas téjasā sám̐śiśādhi //

3.5.13.1

úpahūtam̐ rathaṃtarám̐ sahá pṛthivyā́ /
úpa mā rathaṃtarám̐ sahá pṛthivyā́ hvayatām /
úpahūtaṃ vāmadevyám̐ sahā́ntárikṣeṇa /
úpa mā vāmadevyám̐ sahā́ntárikṣeṇa hvayatām /
úpahūtaṃ bṛhat sahá divā /
úpa mā bṛhat sahá divā́ hvayatām /
úpahūtāḥ saptá hótrāḥ /
úpa mā saptá hótrā hvayantām /
úpahūtā dhenúḥ sahá_ṛṣabhā /
úpa mā dhenúḥ sahá_ṛṣabhā hvayatām //

3.5.13.2

úpahūto bhakṣaḥ sákhā /
úpa mā bhakṣáḥ sákhā hvayatām /
úpahūtā́3ṃ hó /
íḍā_úpahūtā /
úpahūtā_íḍā /
úpo asmā́m̐ íḍā hvayatām /
íḍā_úpahūtā /
úpahūtā_íḍā /
mānavī́ ghṛtápadī maitrāvaruṇī́ /
bráhma devákṛtam úpahūtam //

3.5.13.3

dáivyā adhvaryáva úpahūtāḥ /
úpahūtā manuṣyā̀ḥ /
yá imáṃ yajñám ávān /
yé yajñápatnīṃ várdhān /
úpahūte dyā́vāpṛthivī́ /
pūrvajé ṛtā́varī /
devī́ deváputre /
úpahūtā_iyáṃ yájamānā /
indrāṇī́_ivāvidhavā́ /
áditir iva suputrā́ /
úttarasyāṃ devayajyā́yām úpahūtā /
bhū́yasi haviṣkáraṇa úpahūtā /
divyé dhā́mann úpahūtā /
idáṃ me devā́ havír juṣantām íti tásminn úpahūtā /
víśvam asyāḥ priyám úpahūtam /
víśvasya priyásya_úpahūtasya_úpahūtā //

Commentaries (4)

Linked texts (12)