Kaṭha Upaniṣad 2.16-2

2.16-2

bhūyāditi yatkāmayate, tasya tadbhavati ityarthaḥ |
ā.bhā. - samprati praṇavapraśaṃsāṃ mantradvayena karoti - etadeva - idameva, oṃkārarūpam akṣaraṃ brahma - svajapādinā brahmaprāptisādhanam ityarthaḥ | brahmaprāptisādhane brahmatvāropāt, praṇavasya praśaṃsā abhivyajyate | etaddhyevākṣaraṃ param idameva praṇavarūpamakṣaraṃ japanīyeṣu dhyātavyeṣu ca vastuṣu śreṣṭham ityarthaḥ | praṇavajapasya taddhyānasya itarajapādyapekṣayā śīghreṇa, paramātmapratipattikārakatvāt | asya śreṣṭhatvaṃ siddhyati | ubhayatra hi padam prasiddhidyotakam asya āropitabrahmatvaṃ japyādiśreṣṭhatvaṃ ca prasiddhaṃ vedeṣu ityarthaḥ | etaddhyevākṣaraṃ jñātvā - etat akṣaraṃ praṇavaṃ jñātvā samupāsya yaḥ - praṇavopāsakaḥ yat - vastu, icchati - kāmayate, anena me idaṃ syāditi, tat - vastu tasya - siddhyati prāptaṃ bhavatītyarthaḥ | hi paramatrāpi pūrvoktārtham |
su. - atha vācakaṃ praṇavaṃ prastauti - etaddhyevākṣaraṃ brahma - japopāsanādinā brahmavat sakalābhīpsitasampādakatayā brahmeti stūyate | etaddhyevākṣaram param - japyeṣu śreṣṭham | etadevākṣaram - śabdasvarūpam, jñātvā samupāsya, yo yadicchati tasya tatsiddhyati | seyaṃ praṇavapraśaṃsā parabrahmapraśaṃsāyāmeva paryavasyati | vācakapraśaṃsā hi vācyapraśaṃsāyāṃ paryavasyati ||