Kathakagrihyasutra 10.14

10.14

viśvā sarvā āśāḥ kāmanā avidyāvāsanāḥ, tāḥ patnyaḥ brahmaṇa āyattāstattvajñānāṃśena, avidyāṃśena tu bhāryāḥ | iha patnīnāṃ parijñānameva kevalaṃ, natu homaḥ āhutitvānavagamāt | yathā ‘sa no bhuvanasya’ iti pūrṇāṃ srucaṃ juhuyāt, ekaivāhutirucyate | yathā ‘mithunā āhutayaḥ prajāyai dvādaśa’ iti dvādaśānāṃ mithunatvamuktaṃ natu trayodaśyāḥ | sūtramapi caturdaśamantrasya patnīparijñānamātraparyavasāyitvaṃ dyotayati, evamapi eṣo'pi rathākhyo gandharvaḥ sapatnīko vidito bhavati | rathaḥ saptarathaḥ |
ṛtavo vasantādyāstāṃstadadhiṣṭhātṛbhūtāśca devatā nāmadheyena yajeta | evaṃ tithīstadadhiṣṭhātṛbhūtāśca devatā yajeta | tathā nakṣatrāṇyaśvinyādīni, taddevatāśca | tāśca śāntivimokamantreṣu paṭhitāḥ, vyākhyātāśca | pradhānadeśā vā prādhānyamiti vijñeyam | sviṣṭakṛdājyabhāgamadhyaṃ hi pradhānasthānam, prācīnārvācīnavargau ca sādhāraṇau | prayājānuyājāstu gṛhamedhatvena pākayajñeṣu niṣiddhāḥ | 'gṛhamedho vai pākayajño na prayājānuyājā ijyante, nānuyājasāmidhenīranvāha' iti śrutiḥ |