Kathakagrihyasutra 17.6

17.6

no'smākaṃ prajāpatiḥ prajāmājanayatu, dhātā ca prajāmājanayatu | saṃvatsaraśca mayi puṣṭiṃ dadhātu karotu | sa hi puṣṭipatiḥ | kiṃ kurvan | ṛtubhiścākḷpānaḥ, ṛtubhiḥ prayojyakartṛbhiḥ ṛtuphalāni kalpayan saṃpādayan |
agniḥ prāśnātu prathamassa hi veda yathā haviḥ | śivā asmabhyamoṣadhīḥ karotu viśvacarṣaṇiḥ || idaṃ navānnaṃ prathamamagniḥ sviṣṭakṛtprāśnātu | sa hi veda jānāti yathā haviḥ haviṣo yathāsvarūpaṃ, prāśya cāsmabhyamasmadarthaṃ śivāḥ sukhakāriṇīḥ vrīhyādikā oṣadhīḥ karotu | kīdṛśaḥ | viśvacarṣaṇiḥ viśvasya sarvasya draṣṭā ||
cerābhāgasya yajamānabhāgasaṃjñā | atra cerāvasare 'vatsaḥ prathamajo dakṣiṇā' iti śrutiḥ ||
triṣṭup | he devāḥ, no'smākaṃ bhadrācchreyaḥ samanaiṣṭa, bhadrādapyutkṛṣṭādapi śreyo bhadrataraṃ samanaiṣṭa samyak prāpayata | navavrīhe, tvayāvasena bhuktena samyagaśīmahi prāpnuyāma tvāṃ, nirantaramavicchinnaṃ tvamasmākaṃ bhavetyarthaḥ | he pito anna, madhumanmadhurasa, sa tvaṃ no'smān āviśa śarīrābhyantaraṃ praviśa, iha ca śarīre āviṣṭaḥ san śivaḥ sukhakaraḥ tokāya putrāya edhi bhava tanve tanvarthaṃ śarīrahitāyetyarthaḥ ||
etaṃ yavaṃ yamaśnāti taṃ devā acakṛṣuḥ kṛtavantaḥ utpāditavantaḥ sargādau | utyamuttamuttamaṃ vā | madhunā madhurasena yuktam | kadā| sarasvatyā uttamāyā vācaḥ ādhirājye sati | pṛthivī sarasvatī saro jalamasyā astīti kṛtvā | tatrendraḥ sīrapatirhalapatirāsīt, śatakraturbahukarmā prajāpatiḥ, marutastu kīnāśā balīvardā āsan saṃjātāḥ | sudānavaḥ śobhanadātāraḥ |