Pramāṇa · Search · About · API

Paraskaragrihyasutra 4.2.3

Pāraskaragṛhyasūtrabhāṣya 4.2.3

Language
Sanskrit

4.2.3

uktaśca tatkimartham, bahutvaviśiṣṭānāmatra devatātvaṃ yathā syāditi | kiṃca syāt dve apyagnyādheyadevate sta eva, tayoreva devatātvammābhūditi punargrahaṇācca bahvīnāndevatātvam | ājyabhāgāvighvājyāhutīrjuhotīti kimarthamidamucyate | āghārādīnāścaturdaśājyāhutīnāṅkrama uktaḥ tatrāṣṭājyāhutīnāmavasaravidhānārthamājyabhāgagrahaṇam | aṣṭagrahaṇaśca matrapratīkasaṃśayavyudāsārtham | aṣṭau purastādājyāhutīrjuhotyagnyādheyadevatāhomasya | 'evamu–riti' sthālīpākasyetyavayavalakṣaṇā ṣaṣṭhī | agnyādheyadevatābhyo hutvā evamupariṣṭādaṣṭāveva ājyāhutīrjuhoti | havirantare sati prāṅmahāvyāhṛtibhyaḥ sviṣṭakṛddhomo vihitaḥ tasmai hutvā, caśabdādājyāhutiñjuhoti ayāśyagnerityanena mantreṇa | 'varhirhutvā prābhāti' varhirhomaścātraiva vidhānasāmarthyādihaiva vacanānnānyatra | 'tato brāhmaṇabhojanam' ekadvibahuṣu samāsasya tulyatvādekasminnapi cārthasya kṛtatvādekasyaiva bhojanamiti | nirvṛttyuttarakālaṃ dārakālaḥ| api ca smaranti tameva dārakālaṃ prakṛtya dharme cārthe ca kāme ca nātticaritavyamiti| pūrvaṃ ca kriyamāṇe ādhāne ekenaivāgnirāhito bhavati| tathāsatyaticāraḥ syāt, tasmāccaturthyuttarakālameva dārakāla iti sampradāyaḥ| yatpunaruktam, vaivāhike'gnau kurvīta gārhaṃ karma yathāvidhi| paścayajñavidhānaṃ ca patnī cānvāhikīṃ gṛhīti| tadvivāhasamanantaraṃ kriyamāṇo'sau vaivāhika eva| 'dāyādyakāla ekeṣām' keṣāścidācāryāṇāṃ mate dāyādyakāle tatkartavyam| dāyādyakālaśca bhrātṝṇāṃ dhanavibhāgakālaḥ|

Linked texts (1)