Vastu-shastra (Vol. I: Hindu Science of Architecture; Vol. II: Hindu Canons of Iconography and Painting) v1.c65.35

v1.c65.35

नन्द्यावर्तस्तु पूर्णायां भवे (देको?दद्धो) यथाक्रमम् ।
कर्णे प्राग्दक्षिणे नन्दां वास्तुनः स्थापयेद्बुधः ॥
अन्याः क्रमेण भद्राद्याः कोणेष्वन्येषु च त्रिषु ।
प्रतिष्ठापनमन्त्राश्च तासां चतसृणामपि ॥
चत्वार ऋषिभिर्गीताः शाश्वतारम्भदर्शनाः ।
वीर्येणादिवराहस्य वेदार्थैस्त्वभिमन्त्र (ताः?ताम्) ॥
वसिष्ठनन्दिनीं नन्दां प्राक् प्रतिष्ठापयाम्यहम् ।
सुमुहूर्ते सुदिवसे सा त्वं नन्दे ! निवेशिता ॥
आयुः कारयितुर्दीर्घं श्रियं चात्रामिहावह ।
भद्रासि सर्वतोभद्रा भद्रे ! भद्रं विधीयताम् ॥
कश्यपस्य प्रियस्रुते ! श्रीरस्तु गृहमेधिनः ।
जये ! विजयतां स्वामी गृहस्यास्य महात्मनः ॥
आचन्द्रार्कं यशश्चास्य भूम्यामिह विरोहतु ।
त्वयि सम्पूर्णचन्द्राभे ! न्यस्तायां वास्तुनस्तले ॥
भवत्येष गृहस्वामी पूर्णो । पूर्णमनोरथः ।
इति मूलच (यो?यं) मन्त्रैः कुर्यात् स्वस्तिकवाचनैः ॥
ताभिर्हिरण्यवर्णाभिः शिलाभिः सममद्भुतम्।
प्रागुदक्प्लवना धन्या न प्रत्यग्दक्षिणाप्लवा ॥
इष्टकाश्चैत्यभवनप्राकारपरकर्मसु ।
विताने चितिविन्यासे चतुर्मुखनिकेतने ॥
पुरोधाः शान्तिवेदीषु प्रतिमास्थापनेषु च ।
याज्ञिकेन विधानेन क्रमशः स्थापयेच्छिलाः ॥