Vastu-shastra (Vol. I: Hindu Science of Architecture; Vol. II: Hindu Canons of Iconography and Painting) v1.c67.88

v1.c67.88

सर्वत्र देवभागस्तु तुङ्गो वाऽधिष्ठितोऽपि वा ॥
अयुग्मपङ्क्तिसंयुक्तो नानाचित्रमनोहरः ।
द्वितीयश्चन्द्रकान्तस्स्यात्सव्यसव्येतरात्मकम् ॥
भागं विभज्य वेदेन षण्णवत्यंघ्रिकल्पनम् ।
मध्ये - वेदपदस्थानं तद्दैवतमुदीरितम् ॥
तृतीयश्चेन्द्रकान्तस्स्यात्पार्श्वयोष्षट्प्रमाणकम् ।
स्तम्भकल्पनमत्रोक्तं वसुपङ्क्तीः प्रकल्पयेत् ॥
मध्ये वेदपदस्थानं तद्दैवतमुदीरतम् ।
चतुर्थो गन्धर्वकान्तश्चतुष्कोणो चतुःक्रमम् ॥
स्तम्भषोडशकं स्थाप्यं तदन्तश्च यथामतम् ।
पूर्वपृष्ठपदोपेतन्नागपादमकल्पनम् ॥
तत्संख्याकं तदन्तश्च चतुःपङ्क्तिकमात्पदम् ।
तदन्तर्वेदपादन्तु दैवस्थानमुदाहृतम् ॥
पञ्चमो ब्रह्मकान्तस्स्यान्मुखपादेऽष्टपादकम् ।
पृष्ठे च तन्क्रमात्स्तम्भस्थापनं चात्र गण्यते ॥
तदङ्गणस्थानमाहुशिल्पशास्त्रविशारदाः ।
ततष्षट्स्तम्भविन्यासद्वयं स्थाप्यन्तु पार्श्वयोः ॥
पृष्ठे चैवं स्थापनीयं मध्ये द्वात्रिंशदङ्घ्रिकम् ।
तन्मध्ये वेदपान्तु तद्दैवतमुदाहृतम् ॥
अन्त्यकल्पनमेतत्तु विषमस्थानकं मतम् ।
आद्यं समं कल्पमाहुश्शास्त्रज्ञा वेदपारगाः ॥
समरेखां दृष्टिहीनं मनोहारिप्रकल्पनम् ।
स्तम्भानां मुखभागेषु पूर्वोत्तरपदस्थली ॥
यथाविभवतः स्थाप्या नानालङ्कारमण्डिताः ।
स्थापनीया विशेषेण देवानां प्रीतिदायिनी ॥