Viramitrodaya 1.p276

1.p276

meghagarbhadhāraṇena dṛṣṭivicāraḥ | udakārgalaḥ jalavṛddhikṣayaprayuktasubhikṣadurbhikṣavicāraḥ | ṛtusvabhāvāḥ tattadṛṛtvasādhāraṇalakṣaṇāni | sandhyā udayāstakālarāgeṇa phalaviśeṣakathanam | ulkā nabhaso jvālāpātaḥ | atra grahapākāḥ aṣṭau ṛtusvabhāvāḥ ṣaṭ evaṃ catvāriṃśadupāṅgasaṅkhyāpūraṇaṃ bhavati | evaṃ cāṅgopāṅgamelanena catuḥṣaṣṭirbhavati jyautiṣasyāṅgāni | bhūtabhavyabhaviṣyajñaṃ gaṇitajñaṃ viśeṣataḥ | vicandrā śarvarī yadvanmukuṭaṃ ca cyutopalam || gaṇitena tathā hīnaṃ jyautiṣaṃ nṛpasattama | āstikaṃ śraddadhānaṃ ca anukūlaṃ mahīpate || sāṃvatsaraṃ nṛpo gatvā varayetprayataḥ śuciḥ | yenābhiṣikto nṛpatirvirnaṣṭastu narādhipaḥ || sāṃvatsaraṃ na taṃ vidvān varayennṛpasattama | na hīnāṅgaṃ na vācālaṃ na ca niṣpratibhaṃ nṛpa || kuveṣaṃ malinaṃ caṇḍaṃ nāstikaṃ pāpaniścayam | bhinnavṛttiṃ na varayeddūrayetsaṅguṇaṃ sadā || varayitvā tu vaktavyaḥ svayameva mahībhujā | yathaivāgnimukhā devāstathā rājamukhāḥ prajāḥ || yathaivāgnermukhaṃ mantrā rājñāṃ sāṃvatsarastathā | tvaṃ me mātā pitā caiva deśikaśca gurustathā || daivaṃ puruṣakāraśca jñātavyaḥ satataṃ tvayā | deśikaḥ ājñāpradaḥ | samadharmamadharmaṃ ca rājyaṃ sādhāraṇaṃ hi nau || śamanīyo'śubho daivastvayaiva mama śāntibhiḥ | pauruṣeṇa padaṃ kāryaṃ samare ca sadā mayā || aśubho daivaḥ aśubhādṛṣṭam | tenoddiṣṭau ca varayedrājā mantripurohitau | tenoddiṣṭāṃ tu varayenmahiṣīṃ nṛpasattama || tato'bhiṣekasambhāṃrāṃstasya kuryātsa daivavit | kuñjaraṃ turagaṃ kuryāttasya rājñaḥ parīkṣitam || bhadrāsanaṃ ca chatraṃ ca bālavyañjanameva ca | khaḍgaṃ cakraṃ tathā cāpaṃ ratnāni vividhāni ca || rājño mṛtasya ye tvāsan sarva ete narādhipa | na te kāryā narendrasya tena daivavidā tadā || kāmaṃ sāṃvatsaraḥ kāryo hyalābhe'nyasya bhūbhujā | guṇādhikasya no kāryā ye'nyatrābhihitā mayā