Viramitrodaya 9.p67

9.p67

prāptaśca paramāṃ prītiṃ tamavocamṛrṣi tadā || sādhu brahmanmahābhāga sālaṅkāyana sattama | tapasānena santuṣṭaḥ stutyā caivānayā tava || varaṃ varaya bhadraṃ te saṃsiddhastapasā bhavān | evamuktaḥ sa tu mayā sālaṅkāyanako muniḥ || śālavṛkṣaṃ samāśritya nibhṛtenāntarātmanā | tato māṃ bhāṣate devi sa ṛṣiḥ śaṃsitavrataḥ || tavaivārādhanārthāya tapastaptaṃ mayā hare | iti tadvacaḥ samākarṇya tasmai abhilaṣitaṃ varaṃ dattvā taṃ pratyahamityavocamanyacca guhyaṃ vakṣyāmi sālaṅkāyana tacchṛṇu | tava prītyā pravakṣyāmi yenaitatkṣetramuttamam || śālagrāmamiti khyātaṃ tannibodha mune śubham | yo'yaṃ vṛkṣastvayā dṛṣṭaḥ so'hameva na saṃśayaḥ || etatko'pi na jānāti vinā devaṃ maheśvaram | māyayāhaṃ nigūḍho'smi tvatprasādātprakāśitam || evaṃ tasmai varaṃ dattvā sālaṅkāyanakāya vai | paśyatastasya vasudhe tatraivāntarhito'bhavam || vṛkṣaṃ dakṣiṇataḥ kṛtvā jagāma svāśramaṃ muniḥ | mama tadrocate sthānaṃ girikūṭaśiloccaye || śālagrāmamiti khyātaṃ bhaktasaṃsāramokṣaṇam