Bhagavadgita 4.31

4.31

svadharmamiti | yadā kartā karaṇaṃ kāryaṃ ca sarvaṃ brahmaiveti vijñātaṃ tadā na kiṃcitkartavyamevopapadyate | yadyete madīyā mayā hanyanta iti bhedajñānaṃ tadāpi | castvarthaḥ | ‘yuddhaṃ svadharmo nṛpateḥ prajānāṃ paripālanam’ ityādiśāstroktaṃ svadharmaṃ kṣatriyasya kartavyatvena vihitamavekṣya svabuddhyā vicārya tvaṃ vikampituṃ svadharmāccalituṃ nārhasi | svadharmaṃ tyaktuṃ nārhasītyanena svadharmatayā kartavyatvena prāpte yuddhe yāga iva śokamohau hiṃsādidoṣavicāraśca na kartavyo viduṣeti sūcitam | dharmaśāstrādāgataṃ dharmyaṃ kartavyatvena vihitaṃ tasmādyuddhādanyadaparaṃ śreyaḥsādhanaṃ kṣatriyasya na vidyate nāsti | jayalabdhadhanaikasādhyairyajñairdānairvratādibhiścicattaśuddhistayā jñānaṃ tena mokṣa iti yuddhasya śreyaḥsādhanatā yuktā tato yuddhaṃ kartavyameveti siddham | 'ye yudhyante pradhaneṣu śūrāsaḥ' ityādiśrutiprasiddhidyotanārtho hiśabdaḥ |
nanu jayaścedyuddhasya śreyaḥsādhanatā syānmṛtiścenna kimapyastītyata āha-