Bhagavadgita 4.40

4.40

neheti | iha mokṣaikaprayojane uktakarmayoge nābhikramanāśo'sti abhikrama upakramaḥ karmaṇa ārambhastasya nāśo nāsti | kṛṣivāṇijyādāvārabdhe sati kvacitphalati kvacinna phalati na tatheḍhaṃ kiṃtu niyataphalavadeva bhavati bhuktivat | atra pratyavāyo na vidyate jñānājñānakṛtakarmaniyamādilopakṛto doṣaḥ rājājñāvannānarthāya kalpate | asya bhaktyā kriyamāṇasyeśvarārādhanātmakasya vedoktasya dharmasya saṃbandhi svalpamapi kevalāgnihotraṃ vā śrautamaupāsanaṃ vā smārtaṃ śraddhayā kṛtaṃ karma cittaśuddhijananadvārā jñānahetutvāt kartāraṃ mahato bhayājjananamaraṇaduḥkhāttrāyate rakṣatyato mumukṣoḥ śrautaṃ smārtaṃ cobhayaṃ vā śraddhābhaktibhyāmakāmanayeśvaraprītayai yathāśaktyavaśyaṃ kartavyamīśvaraprītyarthameva kṛtena karmaṇā pumān tarati nānyatheti sūcitaṃ bhavati |
yogaviṣayiṇyā buddhyā viśiṣṭaḥ pumān taratītyuktaṃ yogaviṣayiṇī buddhiḥ kīdṛśyākāṅkṣāyāṃ tasyāḥ svarūpaṃ vadan taditarabuddhiviśiṣṭānāṃ na kadācittaraṇamastīti sūcayati—